Memleket muraty – «Máńgilik El»

Sultanmahmut Toraıǵyrov aıtady ǵoı: «Alash týy astynda – kún sóngenshe, sónbeımiz», dep. Búgingi bizdiń murat ta sol. Táýelsizdik týyn jelbiretken Qazaqstandy eshkimniń kóz alartýyna ushyratpaı, memlekettiligin máńgilikke jalǵastyrý. Elbasy Nursultan Nazarbaevtyń jurt aldynda «Qazaq eliniń ulttyq ıdeıasy – Máńgilik El» dep usynýy da osy maqsattyń sheńberinde jatyr. Osyǵan sáıkes, álemdegi damyǵan memleketterdiń úzdik otyzdyǵyna kirý josparlanyp, sol jolǵa bastaıtyn «100 naqty qadam» jasaqtalyp, taǵdyrsheshti kezeńnen aman alyp shyǵatyn 5 ınstıtýttyq reforma usynyldy. Búginde bul maqsat-murattardy iske asyrý el kóleminde iske asyp jatyr. Bıyl Táýelsizdik tańynyń at­qanyna shırek ǵasyr tolady. Osyǵan oraı, Elbasynyń «Máńgilik El» ıdeıasymen qýattanǵan, «100 naqty qadam» Ult Josparyn dáriptegen respýblıkalyq «Máńgilik El» áleýmettik aksııasynyń top músheleri senbi kúni Syr eline keldi. О́ńirge taban tiregen «Máńgilik El» poıyzynyń top quramyn oblys ákiminiń orynbasary Ǵalymjan Ámireev bastaǵan syrboıylyqtar barsha sán-saltanatymen qarsy aldy. Temirjol vokzalynda oblys ákiminiń orynbasary Ǵ.Ámireev delegasııa múshelerine sáttilik tilep, «Máńgilik El» jolyndaǵy damýymyzdyń jedel, keleshegimizdiń kemel bolýyna tilektestigin bildirdi. Al top jetekshisi Ámirjan Álpeıisov bastaǵan quram músheleri qala turǵyndaryna sharanyń mán-maǵynasy men mańyzyn túsindirip berdi. Temirjol vokzalynda ótken kezdesýden soń top músheleri Asqar Toqmaǵambetov atyndaǵy qalalyq mádenıet úıinde memlekettik qyzmetkerler, túrli sala ókilderi men qala turǵyndary jáne jastarmen kezdesti. Jıyn barysynda L.N.Gýmılev atyndaǵy Eýrazııa ulttyq ýnıversıtetiniń professory ári top jetekshisi Ámirjan Álpeıisov Syr eliniń ótkeni men búgingisine toqtalyp, tarıhı tulǵalaryna qatysty taǵylymdy oılarymen bólisti. – Elimizdiń egemendik alýy – hal­qy­myzdyń tarıhynda jańa dáýir­diń betin ashty, búkil qoǵamdyq ómirimizge jańa lep, sony serpin ákeldi. Qazir ata-baba­larymyzdyń, el baqytyn ańsaǵan armandary oryndaldy. Barsha­myz beıbit ómirde, erkindikti ańsaǵan aq nıet, aq tileýmen ózimiz tikken ortaq shańyraǵymyzdyń baǵy men sáni úshin qyzmet jasaýda­myz. Elbasy Nursultan Nazarbaev bıyl jarııalaǵan «Ult Jos­pary – qazaqstandyq armanǵa bas­taıtyn jol» atty baǵdarla­malyq maqalasynda «Ata-baba­lary­myzdyń kóptegen urpaqtary úshin Qazaqstannyń Táýelsizdigi asyl arman bolyp keldi. Biz olardyń azat jáne táýelsiz Otandy ańsaǵan kóp ǵasyrlyq qııaldaryn is júzine asyrdyq» dep atap kórsetken edi. Biz osy joldan tanbaı, damýǵa umtylǵan, úzdik otyzdyqtyń ishinen oıyp oryn alýǵa, «Máńgilik El» jolyndaǵy jarqyn isimizben kúlli álemdi tań qaldyryp, udaıy alǵa umtylýymyz qajet!– dedi Á.Álpeıisov. Ǵalymnyń oıly áńgimelerinen soń Elbasynyń «Máńgilik El» ıdeıa­sy, «Qazaqstan jańa jahandyq ahýalda: ósim, reformalar, damý» atty Qazaqstan halqyna Joldaýy, «100 naqty qadam» Ult Josparyndaǵy alǵa qoıylǵan bas­ty mindetter men maqsattar jaıynda Astana qalalyq «Qoǵamdyq kelisim ortalyǵynyń» dırektory Talǵat Jaqııanov jan-jaqty aıtyp berdi. Talǵat Járdemuly Qazaqstan halqy Assambleıasynyń negizgi jumystaryna toqtalyp, álemde balamasy joq birden-bir saıası ınstıtýttyń erekshelikteri jóninde sóz qozǵap, birtektilik pen birlik berekeniń bastaýy, otanshyldyq táýelsizdiktiń basty tiregi ekenine toqtaldy. – Elbasy elimizdiń birtutastyǵy men birligi jaıynda únemi aıtyp keledi. Búgingideı beıbit ómirdiń qalyptasýy – Memleket basshysy ustanǵan saıasat pen halyqtyń bolashaqqa degen seniminiń arqasy. Tatýlyq bar jerde kıkiljińniń bolýy ekitalaı, muny ýaqyttyń ózi dáleldedi. Endigi jerde ultqa, dinge, túrge bólinbeı, qazaqstandyqtar bolyp beıbitshilik pen birliktiń nátı­jesinde ozyq otyz eldiń qataryna ený jolyndaǵy ortaq maqsatqa jumylýymyz qajet,– dedi ol. Shara aıasynda qatysýshylar el damýy men birligi baǵytynda suraq­tar qoıyp, tushymdy jaýap­tarǵa qanyqty. Kezdesýden soń toptaǵy ár salanyń mamandary josparǵa sáıkes bólinip, oblys turǵyndaryna kásibı turǵyda keńester berip, jumystaryn jalǵastyrdy. Erjan BAITILES, «Egemen Qazaqstan». Qyzylorda oblysy.