ASTANA. 15 naýryz. Qazaqstan velosporty taǵy bir jeńiske jetti. Trekte ótetin jarystarda omnıým qashyqtyǵyna qatysatyn velosportshy Artem Zaharov Jazǵy Olımpııa oıyndaryna lısenzııany jeńip aldy. Bul týraly egemen.kz tilshisi habarlady.
Omnıým – velotrektegi qashyqtyq. Bul jarystar alty qashyqtyqta ótedi. Sońǵy eki jylda Artem Zaharov halyqaralyq týrnırler men jarystarda osy qashyqtyqtardyń bárinde úzdik nátıje kórsetip keledi. Mysaly, ol Azııa chempıonaty men Álem kýbogynda kózge túsip, olımpııalyq TOP-18 reıtıngisine kirdi. Sóıtip, Qazaqstan velosportshylary alǵash ret 2004 jylǵy Afına Olımpıadasynan keıin tolyq tizimmen Brazılııada ótetin dúbirli dodaǵa qatysatyn bolady.
Esterińizge sala ketsek, Olımpııa oıyndaryna birden lısenzııa berilmeıdi. Oǵan jarystarda jaqsy nátıje kórsetip, irikteý júıesine ilikken sportshylar ǵana barady.
Qazir Qazaqstan sportshylarynda Olımpıadanyń 50 lısenzııasy bar.
Artem Zaharov –2013 jylǵy Azııa chempıony, Azııa kýbogynyń ıegeri, Álem kýbogynyń 2013 jáne 2016 jylǵy qola júldegeri, omnıým qashyqtary boıynsha ótken Azııa chempıonatynyń kúmis jáne qola júldegeri.
Dastan Kenjalın.
Derek, sýret: Qazaqstan velosıped sporty federasııasy.
