Elbasy «Qazatomónerkásiptiń» basshysyn qabyldady

ASTANA. 15 naýryz. Memleket basshysy «Qazatomónerkásip» UAK» AQ basqarmasynyń tóraǵasy Asqar Jumaǵalıevti qabyldady. Bul týraly akorda.kz habarlady. Kezdesý barysynda Asqar Jumaǵalıev Memleket basshysyna buryn berilgen tapsyrmalardyń oryndalýy, kompanııany transformasııalaý baǵdarlamasynyń júzege asyrylý barysy týraly baıandady. Qazaqstan Prezıdenti bizdiń respýblıka álemdegi tolyq óndiristik sıkl qurýǵa umtylyp otyrǵan iri ýran óndirýshi el ekenin aıtty. «Kompanııa eldiń mańyzdy aktıvi sanalady. «Qazatomónerkásiptiń» ártúrli birlesken kásiporyndarda qatysý úlesi bar, olardyń birazy boıynsha seriktester moıyndaryna alǵan mindettemelerin oryndamaıdy. Osyǵan baılanysty olardyń óz mindettemelerin oryndaýyn qamtamasyz etý kerek, nemese aktıvterdi memleket múddesi úshin qaıtarý múmkindigin qarastyrý qajet», – dedi Memleket basshysy. «Qazatomónerkásip» UAK» AQ basqarmasynyń tóraǵasy áleýmettik nysandardyń jergilikti atqarýshy organdar qaraýyna berilgeni, kásibı baǵdarǵa jatpaıtyn 11 kásiporynnyń básekelestik ortaǵa shyǵarylǵany jáne ótken jyldyń qorytyndysy boıynsha ýran óndirýshi kásiporyndar keńseleri óndiris ornalasqan óńirlerge kóshirilgeni týraly baıandady. Asqar Jumaǵalıev transformasııa baǵdarlamasy aıasynda qabyldanǵan keshendi sharalar nátıjesi boıynsha «Qazatomónerkásip» óndiristik ózindik qundy 16 mıllıard teńgege tómendetkenin, al kompanııanyń ekonomıkalyq qosylǵan qunyn 17 mıllıard teńgege jýyq ósirgenin aıtty. Ulttyq kompanııa basshysy Elbasyǵa óndiristi ártaraptandyrý úshin qabyldanǵan, atap aıtqanda, AES otynyn óndirý zaýytynyń qurylysyna daıyndyq sharalary týraly baıandady. Memleket basshysy kezdesý qorytyndysy boıynsha birqatar naqty tapsyrma berdi. Elaman Qońyr. Derek, sýret: akorda.kz.