Birligi men tirligi jarasqan el ekensizder

Árıne, elimizde ótip jatqan saılaýdy qadaǵalaý úshin shetelden kóptegen baıqaýshylar keldi. Solardyń biri – Táýelsiz Memleketter Dostastyǵy baıqaýshylar mıssııasy uıymynyń ókili, Reseıdiń Lenıngrad oblysynan kelgen Elena Lıýbýshkınamen az-kem tildesýdiń sáti tústi. – Elena Vıktorovna! «Syrt kóz – synshy» degen. Saı­laý­shylardyń belsendiligi qalaı? – Ashyǵyn aıtý kerek, Qa­zaqstanda saılaýshylardyń jo­ǵary belsendiligi birden baıqaldy. Jáne saılaýshylardyń daýys berýine barlyq jaǵdaı jasalǵan. Taǵy bir unaǵany – búkil otbasymen kelip daýys berip jatqandardy jıi kórdim. Jáne báriniń osynaý naýqanǵa atsalysqandaryna qýanyshty ekendikteri bal-bul janǵan júz­derinen baıqalyp tur. Bul árıne, qazaqstandyqtardyń saıası naýqanǵa óte jaýapkershilikpen qaraǵandaryn bildiredi. Shy­nynda, eldiń bolashaǵy, damýy, órkendeýi otbasynyń berekesi, birligine tikeleı baılanysty emes pe?!. Aspanynda beıbit kúni jarqyraǵan damyǵan eldiń tiregi – baqytty otbasy. Sondaı-aq, ǵalamtordaǵy aq­parattar arqyly Qazaqstannyń qaı azamaty bolmasyn, syrtta júrse de, jarqyn bolashaq úshin daýys berip, eldiń damýyna atsalysyp jatqanyn baıqadym. Bul – óte qýanyshty jaǵdaı. Meniń­she, bul eldiń birlik-yntymaǵy, uıym­shyldyǵynyń mol ekenin bildirse kerek. Tipti, daýys berýge kezekke turǵan jandardyń arasynda jastardyń kóp bolýy bizge de, kelýshilerge de merekelik kóńil-kúı syılap, kúsh-qýat, serpilis bergendeı. – Árıne, saılaýdy baı­­­qaý­­shylarmen áńgimelese qalsaq, «Qandaı da bir zań­buzý­shylyq baıqadyńyz ba?» degen sa­ýal­dyń tilimizdiń ushyn­da turatyny anyq... – Saýalyńyzdyń tórkinin túsindim. Bizdiń basty mindetimiz – saılaýdyń demokratııalyq talaptarǵa saı ashyq ta ádil ótýin baqylaý. Osy maqsatta qanshama sheteldik baqylaýshylar saılaý naýqanyn baqylady. Biz, Lenıngrad oblysynan 4 adam keldik. Onyń ekeýi osy Taraz qalasyna tústik. Kúni boıy birne­she saılaý ýchaskelerinde bolyp, tipti, alystaý aýyldardaǵy saılaý ýchaskelerine de soǵyp, naý­qannyń ádil ótkenine kóz jetkizdik. Eshqandaı zańbuzýshy­lyq oryn alǵan joq. – Qazaqstanda buryn bolǵan ba edińiz? – Buryn-sońdy Qazaqstanda bolǵan emespin. Meniń osynaý ulan-ǵaıyr jeri bar, táýelsiz elge alǵashqy saparym. Árıne, bizdiń Lenıngrad oblysynda osy elden qonys aýdarǵan orys ulttary bar. Olar únemi Qazaq­standy sa­ǵynyshpen eske alyp otyrady. Shynynda, biz qazaq ultyn yn­tymaǵy jarasqan, birligi myqty, eńbekqor halyq retinde bilemiz. Bul saılaý Naýryz merekesimen qatar kelip jatyr eken. Erteń osy ulyq merekege qatysyp, Qazaq­standy jáne osy eldi mekendep jatqan túrli ulttardyń tynys-tirshiligin jaqynyraq bile túsemiz degen oıdamyn. – Áńgimeńizge rahmet.  Áńgimelesken Oralhan DÁÝIT, «Egemen Qazaqstan». Jambyl oblysy.