Rýhanı qundylyqtar qoldaýshysy

Elbasymen birgemiz!

Qazaqstandyqtar N.Nazarbaevtyń prezıdenttik ókilettigin uzartýdy qoldaıdy

«Bizdiń tańdaýymyz – Nursultan Nazarbaev»

dedi demokratııalyq kúshterdiń jalpyulttyq

koalısııasy aksııasyna qatysýshylar

13 qańtarda Taldyqorǵan qa­la­synda «Nur Otan» halyqtyq- demokratııalyq partııasynyń «Qa­zaqstan-2020» jalpyulttyq demokratııalyq kúshter koalı­sııa­syn qurý týraly bastamasyna qol­daý kórsetý jáne qosylý maq­satynda aksııa ótti. Jastardyń jalyndy sózderi asqaqtap, 103 ulttyń ókilinen quralǵan qaýym «Bizdiń qýatymyz – birlikte», «Bizdiń tańdaýymyz – Nazarbaev», «Jastar – Elbasymen birge», «Biz – beıbitshilikti qol­daı­myz» dep Otanynyń erteńine degen berik senimderin ashyq bildirdi. Demokratııalyq kúshter koa­lı­sııasyn uıymdastyrý arqyly Elbasynyń ókilettigin uzartý bastamasyn jalpy halyq bolyp, barlyq saıası jáne úkimettik emes uıymdar qosylyp, referendým ótkizýge alǵashqylardyń qatarynda jetisýlyq jastardyń ún qosýy tegin emes. О́ıtkeni, óńir ekonomıkasy damyp, halyq­tyń áleýmettik-turmystyq jaǵ­daıy kún ótken saıyn jaqsarýda. Kópshilik aldynda spıker, oblystyq máslıhattyń depý­ta­ty, «Qabyrǵatal ónimderi» ón­diristik kooperatıviniń tóraǵasy, ardager Amantaı Zııadanov sóı­le­di. Nurotandyqtardyń basta­ma­symen elimizdegi demokratııa­lyq kúshter birikti. Bul uıym Kósh­basshymyz Nursultan Nazar­baevtyń prezıdenttik ókilettigin 2020 jylǵa deıin uzartý maq­sa­tynda qurylǵanyn bilesizder. Men, ózderińiz saılaǵan oblys­tyq máslıhattyń depýtaty retinde 20704 saılaýshynyń, aýyl sharýashylyǵy eńbekkerleriniń atynan uıymdy qoldaýǵa shaqy­ramyn. Bardyń baryn asyryp, joqtyń joǵyn túgendegen tuńǵysh Prezıdentimizdi álem biledi. Biz muny maqtan etemiz degen ardagerdiń sózin jınalǵandar «Qazaqstan – meniń Otanym», «Biz Elbasyn qoldaımyz» degen asqaq shaqyrýlarǵa ulastyrdy. Ardagerdiń sózin oblystyq «Jasyl el» shtabynyń bastyǵy Tólegen Kenjebekov ilip áketti. – Jetisýdaǵy halyqtyń 691734-i jastar. Osy jastardyń atynan koalısııa bastamasyn qoldap, qosylýǵa shaqyramyn. Osy jı­ynǵa 3 myńǵa jýyq ókil qatysyp otyr. Bizdiń uranymyz – «Elbasy bireý, halyq oǵan tireý!», «Biz Elbasymen birgemiz, berik bizdiń irgemiz». О́z taǵ­dyrymyzdy El­ba­syna tapsyra­myz, degen sózin jas­tar biraýyz­dan qoldaıtyn­dyq­taryn aıqyn ańǵartty. Budan keıin de Ilııas Jan­súgirov atyndaǵy Jetisý memlekettik ýnıversıtetiniń kafedra meńgerýshisi Amangeldi Katenov, Qazaqstan halqy Assambleıa­synyń múshesi Atsalım Idıgov, «Erlik» múgedekter qoǵamynyń tóraıy­my Roza Aqjarkenova, stýdent Sa­mat Súleımenov jı­nalǵan­dar­dy Elbasynyń óki­lettigin 2020 jylǵy 6 jel­toqsanǵa deıin uzar­tý jónindegi demokratııalyq kúshter koa­lısııasynyń bastamasyn qol­daýǵa úndedi. Kúmisjan BAIJAN, Almaty oblysy.

Rýhanı qundylyqtar qoldaýshysy

Sársenbi kúni Qazaqstan Respýblıkasy Ulttyq akademııalyq kitaphanasynda Elbasy Nursultan Nazarbaevtyń prezıdenttik ókilettigin 2020 jylǵa deıin uzartý jónindegi respýblıkalyq referendým­dy qoldaýǵa arnalǵan jınalys ótti. Oǵan Mádenıet mı­nıstrligi Mádenıet komıteti tóraǵasynyń oryn­ba­sary Roza Káripjanova, Ulttyq akademııalyq kitap­hananyń bas dırektory Janna Shaımu­han­be­tova jáne kitaphananyń barlyq qyzmetkerleri qatysty. «Bıyl Qazaqstan Táýelsizdiginiń 20 jyldyǵy» – dep sóz bastaǵan Janna Shaımuhanbetova eldik pen erlik, el táýelsizdigi jaıynda óz oıyn ortaǵa saldy. «Osy jyldar ishinde memleket qurýdyń tańǵajaıyp jolynan elimiz súrinbeı ótti. Memlekettiligimiz nyǵaıyp, jańarýlar men jańǵyrýlarǵa qaraı bet aldyq, álemniń ár alýan elimen dostyq baılanys ornattyq. Bas qalamyz – Astana ósip, órken jaıyp keledi. Al 2010 jyly Qazaqstan EQYU tóraǵasy retinde tarıhtyń tórine kóterildi. Bulardyń bárine biz Elbasymyz Nursultan Ábish­uly Nazarbaevtyń salıqaly saıasatynyń, Qazaq­stan­da turyp jatqan halyqtardyń berik dostyǵy men bereke-birliginiń arqasynda qol jetkizip otyr­myz. Búgin Elbasy Nursultan Nazarbaevtyń prezıdenttik ókilettigin 2020 jyldyń 6 jeltoqsanyna deıin uzartý jóninde respýblıkalyq referendým ótkizý týraly másele kóterilip otyr. Buǵan biz – Ulttyq akademııalyq kitaphananyń ujymy bir­aýyzdan kelisim beremiz» – dedi kitaphana dırektory óz sózinde. Kitaphana qyzmetkerleri barsha qazaq­stan­dyqtar sııaqty eldiń ekonomıkalyq turaqtylyǵy men halqymyzdyń áleýmettik jaǵdaıynyń damýyn, osy jáne basqa da aýqymdy maqsattardy iske asyrý josparlaryn tek Elbasy Nursultan Nazarbaevtyń basshylyǵymen baılanystyratyndyqtaryn jetkizdi. Sondaı-aq Prezıdent Nursultan Nazarbaevtyń ulttyq dástúrimiz ben rýhanı qundylyqtardy jańǵyrtý men saqtaýdaǵy qyzmetin joǵary baǵalaı otyryp, Prezıdenttiń ókilettigin uzartý jónindegi referendýmdy qoldaıtyndyqtaryn bildirdi. Araı ÚIRENIShBEKQYZY.

«Zańgerler ádiletti saılaý úshin»

respýblıkalyq qoǵamdyq birlestiginiń úndeýi

Qurmetti qazaqstandyqtar, qadirli zańger-áriptester! Bizder – «Zańgerler ádiletti saılaý úshin» respýblıkalyq qoǵamdyq birlestiginiń ókilderi, mıllıondaǵan otandastarymyz –Qazaqstan Respýblıkasynyń azamattary sekildi, Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń ókilettigin 2020 jylǵa deıin uzartý jónindegi másele boıynsha referendým ótkizý týraly bastamany qyzý qoldaımyz. Qazaqstannyń demokratııalyq, zaıyrly, quqyqtyq jáne áleýmettik memleket retinde odan ári ornyǵýy jaǵdaıynda, elimiz úshin áleýmettik ilgerileýge qaratylǵan strategııalyq baǵyttyń qalypty ári dáıektilikpen iske asyrylǵany, ishki jáne syrtqy saıası basymdyqtardyń ultaralyq tatýlyq, ózara senim, dástúrdi qurmetteý, ashyqtyq jáne tózimdilik negizinde júzege asyrylǵany qajet ekenine biz senimdimiz. Jańa eýrazııalyq qaýipsizdikti qurý, postkeńestik keńistiktegi ıntegrasııany, ásirese, taıaýdaǵy onjyldyqta jalǵastyrý jáne tereńdetý halyqtyń erik-jigerine negizdelgen berik sabaqtastyqqa súıenýge tıis. Prezıdent N.Á.Nazarbaevtyń konstıtýsıonalızm ıdealdaryna den qoıǵandyǵy jáne onyń san qyrly qaıratkerlik qyzmeti arqasynda Azamat pen Memleket arasynda barǵan saıyn senimniń artyp, ózara qarym-qatynas qalyptasqanyn; adamdardyń sana-sezimi men turmys-tirshiligine konstıtýsııalyq qundylyqtar sińgenin; halyqtyń quqyq mádenıetiniń jáne onyń bılikke degen seniminiń deńgeıi óskenin, quqyq qorǵaý organdary men sottardyń, búkil quqyq qorǵaý mehanızminiń kásibıligi jáne jumys tıimdiligi artqanyn biz kórip otyrmyz. Memleket basshysy bekitken 2010-2020 jyldarǵa deıingi kezeńge arnalǵan Quqyqtyq saıasat tujyrymdamasynyń iske asyrylýy ba­ry­synda adamnyń jáne azamattyń quqyqtary men bostandyqtaryna beriletin kepildik, kásipkerlerdiń qorǵalý deńgeıi arta túsedi; zańnamanyń jańa salalary men baǵyttary paıda bolady; bizdiń quqyǵymyz zamanaýı, jedel ári praktıkanyń qajeti men adamdardyń muqtajyna yńǵaılastyrylǵan bolady. Quqyqty qoǵamnyń shyn mánindegi jasampaz kúshine aınaldyrý úshin osynsha qajyr-qaırat jumsap júrgen Elbasyn biz qazirgi memleketter mysalynan taba almaımyz. Zańger-ǵalymdar, quqyq pániniń oqytýshylary, jeke jáne jarııa quqyq sektoryndaǵy, qoǵamdyq birlestikterdegi zańgerler, advokattar jáne notarıýstar Respýblıka Prezıdentiniń jan-jaqty qoldaýyn sezinedi, barshamyzdyń jáne árqaısymyzdyń múddemizge jaýap beretin, elimizdiń odan ári serpindi damýynyń quqyqtyq vektoryn qamtamasyz etýge qabiletti tulǵalar retinde olar ózderiniń bıik ári jaýapty mıssııasyn uǵynady. «Zańgerler ádiletti saılaý úshin» respýblıkalyq qoǵamdyq birlestigi Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń ókilettigin 2020 jylǵa deıin uzartý týraly respýblıkalyq referendým ótkizý úshin, qoldanystaǵy 1995 jylǵy Konstıtýsııanyń, «Respýblıkalyq referendým týraly», «Qazaqstan Respýblıkasyndaǵy saılaý týraly» konstıtýsııalyq zańdardyń, ózge de konstıtýsııalyq jáne jaı zańdardyń ıdeıalary men erejelerine, sondaı-aq memlekettik qurylystyń sheteldik tájirıbesine negizdelgen qajetti quqyqtyq sharttardyń bári bar dep senim bildiredi. Memlekettik bıliktiń birden-bir bastaýy, osy bılikti óziniń ókilderi arqyly ǵana emes, Konstıtýsııanyń 3-babynyń 2-tarmaǵyna sáıkes tikeleı respýblıkalyq referendým arqyly da júzege asyratyn Qazaqstannyń táýelsiz halqy bul máseleniń búkilhalyqtyq daýys berýge qoıylýyna bastama jasaýǵa jáne Qazaqstannyń memlekettik táýelsizdiginiń jıyrma jyldyǵynda bul másele boıynsha tarıhı ádil jáne meılinshe quyqtyq sheshim qabyldaýǵa ejelden quqyly. Biz barlyq qazaqstandyqtardy jáne birinshi kezekte, zańger-áriptesterimizdi respýblıkalyq referendým ótkizý týraly ıdeıany jan-jaqty qoldaýǵa, oǵan bastama jasaýshylarǵa barynsha kómek­te­sýge, memlekettiń, otandyq, sheteldik jáne halyqaralyq úkimettik emes uıymdardyń ókilderimen yntymaqtasa jumys isteýge úndeımiz. Qazaqstan zańgerleri – referendýmdy qoldaıdy, ony ótkizý Halyqtyń erik-jigerine, el Konstıtýsııasynyń atyna da, zatyna da sáıkes keledi. Almaty qalasy.

El damýynyń basty sharty

Qazaqstan máshıne jasaýshylar odaǵyna kiretin jáne kásiporyndarda jumys jasaıtyn úsh júz myń jumysshylar men ınjenerlerdiń atynan biz Qazaqstan Respýblıkasynyń Prezıdenti – Elbasy Nursultan Ábishuly Nazarbaevtyń ókilettigin 2020 jylǵa deıin uzartý boıynsha referendým ótkizý jónindegi bastamany tolyq jáne sózsiz qoldaıtynymyzdy málimdeımiz. Domen jáne marten peshteriniń jalynynda shynyqqan bizdiń Prezıdentimiz jumysshylardyń búgingi turmys-tirshiligin janyndaı túsinedi, qazaqstandyq azamattarǵa ne qajet ekendigin jaqsy biledi. Prezıdentpen birge biz neshe túrli synaqtardan ótip, qıyn jyldardy oıdaǵydaı eńserdik. Elbasynyń sarabdal saıasatynyń arqasynda táýelsizdik jyldary halqymyzdyń erteńgi kúnge degen senimi nyǵaıyp, turaqty tabysqa, jalaqyǵa, zeınetaqyǵa, turǵyn úıge qol jetkizip, beıbitshilik pen kelisim saltanat qurǵan elde balalaryn tárbıeleýge múmkindik aldy. Búginde Qazaqstandy búkil álem gúldengen, beıbit ómirge umtylǵan, jarqyn keleshekke nyq qadam basyp kele jatqan el retinde tanıdy. Kemeńger Prezıdentimizdiń arqasynda ǵana elimizdiń údemeli ındýstrıalyq-ınnovasııalyq damý baǵdarlamasy dúnıege keldi. Onda máshıne jasaý keshenin jańartý máselesine erekshe kóńil bólingen. Joǵary tehnologııaly qurylǵylarmen jabdyqtalǵan jáne joǵary bilikti mamandarmen qamtamasyz etilgen jańa kásiporyndar salý – bizdiń jaqyn kezeńge arnalǵan basty mindetimiz. Memleketimizdiń negizin qalaýshy, Tuńǵysh Prezıdent – Elbasymyz Nursultan Ábishuly Nazarbaevtyń barlyq bolashaq ózgeristerdiń basy-qasynda bolýy – Qazaqstannyń qaryshtap damýynyń basty sharty bolyp tabylady. Ol – reformalardyń tolyǵymen júzege asýynyń, elimizdiń ilgeri damýynyń, bizdiń ortaq úıimizdegi beıbitshilik pen kelisimniń kepili. Biz gúldengen jáne turaqty Qazaqstan úshin! Osy úndeýmen Qazaqstannyń máshıne jasaýshylar odaǵy jáne oǵan kiretin kásiporyndar Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń prezıdenttik ókilettigi merzimin 2020 jylǵy 6 jeltoqsanǵa deıin uzartý boıynsha jalpyhalyqtyq plebıssıtti qoldaıtynyn jáne referendýmdy qoldaý úshin demokratııalyq kúshterdiń «Qazaqstan-2020» jalpyulttyq koalısııasyna kiretinin málimdeıdi. Májilis depýtaty, «Qazaqstan máshıne jasaýshylar  odaǵy» ZTB-niń basqarma tóraǵasy M.PIShEMBAEV, «Kazagrofınans» AQ-tyń basqarma tóraǵasy D.AITJANOV, «QazMunaı­Gaz» UK» AQ-tyń basqarma tóraǵasy Q.QABYLDIN, «Qazaqselmash» korporasııasy» JShS dırektorlar keńesiniń tóraǵasy A.QAJKENOV, «Mashzavod №1» JShS-niń bas dırektory B.KENJIN, «Qazaqstan temir joly» UK» AQ prezıdenti A.MAMIN, «Qazaqstandyq qubyr ızolıasııasy  zaýyty» JShS dırektory Q.MEIRAMBEKOV, Májilis depýtaty V.ROGALEV, Qaraǵandy máshıne jasaý konsorsıýmy dırektorlar keńesiniń tóraǵasy S. STIýKOV, «Qazaqtelekom» AQ-tyń basqarma tóraǵasy K. ESEKEEV.

Tatýlyq pen turaqtylyqtyń altyn arqaýy

HQTÝ-i Shymkent Akademııalyq ınnovasııalyq ýnıversıtetiniń ujy­my Elbasynyń prezıdenttik óki­let­tigin 2020 jyldyń 6 jeltoqsanyna deıin uzartý jónindegi respýb­lı­ka­lyq referendým ótkizý týraly bas­tamany qoldaý jóninde jıyn ót­kizdi. Oblystyń ózge ult ókilderi ara­syndaǵy qazaq tili baıqaýynyń bas júldegeri, fılologııa fakýltetiniń stýdenti S.Chekýshın: «Men Qazaqstan azamaty bolǵanyma maqtanamyn. Sebebi, elimiz óz tarıhynda talaı qı­yn-qystaý kezeńderdi basynan ót­ker­se de, eldigin saqtap qala bildi. Al memleketimizdiń táýelsizdik jyl­da­ry jetken jetistikteri, baǵyn­dyr­ǵan asýlary eshkimdi de tamsan­dyr­maı, tańqaldyrmaı qoımaıdy. Osy­nyń barlyǵy Elbasynyń arqasy eken­digine eshkim kúmán keltirmeıdi. Bilim alamyn, eńbek etemin degen adamǵa barlyq jaǵdaı jasalǵan», dese, byl­tyrǵy «Eń úzdik jas ǵalym» nomına­sııa­synyń ıegeri, 2-kýrs magıs­tran­ty Ǵ.Pı­sherov: «Qazaqstan halqy tatý­lyq pen turaqtylyqtyń altyn ar­qaýy­na aınaldy. Taǵdyr tabys­tyr­ǵan, tarıh toǵystyrǵan túrli ókil­der Otany­myz­dy birge kórkeı­týde, bir shańy­raqtyń astynda urpaq ósirýde. Olar taǵdyryn Elbasymen baıla­nysty­rady», dedi. Álem jáne Olımpıada oıyn­da­ry­nyń kúmis júldegeri, ýnıversı­tet­tiń aǵa oqytýshysy Muhtarhan Dil­dábekov: «Bul – elimizdiń eldigin, ultymyzdyń ulylyǵyn, halqymyz­dyń birligin tanytar qasıet. Búgingi tilekterimizdi, memlekettiń mereıli bolashaǵyn adaldyqpen ańsaıtyn, ózin Otanymyzdyń shyn patrıoty, shynaıy janashyr azamaty dep esepteıtin árbir qazaq jáne árbir qa­zaq­standyq qoldaıdy degen senimdemiz. Qorǵaýǵa turar elimiz, qoldaýǵa tu­rar Kóshbasshymyz bar. Endeshe nege osyndaı jarqyn isterdiń bastaýy bola bilgen janashyr Elbasymyzdy bir­aýyzdan qoldamasqa. Biz árqashan Elbasymen birgemiz», – dep sóz sabaqtady. Májiliste shyǵyp sóıleýshilerdiń bári de Elbasynyń ókilettigin uzartý­dyń qajettiligi týraly oılaryn bildirdi. Baqtııar TAIJAN, Ońtústik Qazaqstan oblysy.

Mádenıet qyzmetkerleri qyzý qoldaýda

Pre­zı­denttik mádenıet orta­ly­ǵyn­da Elbasy Nursultan Nazar­baevtyń ókilettigin 2020 jyl­ǵa deıin uzartý týraly referendým ótkizýdi qoldaý maqsatynda aksııa bolyp ótti. Aksııaǵa Prezıdenttik máde­nıet ortalyǵy, Ult­tyq muraǵat, Ulttyq kitaphana, Altyn jáne baǵaly metaldar mýzeıi me­ke­me­leriniń qyzmetkerleri, má­de­nıet jáne qoǵam qaıratkerleri qatysty. Basqosýdy ashqan Prezıdenttik mádenıet orta­ly­ǵy­nyń dı­rek­tory, fılologııa ǵylym­da­ry­nyń dok­to­ry, professor Myrza­taı Joldasbekov Táý­el­­siz­dik­tiń eleń-alań shaqta­ryn­da Elbasy­nyń janynda bolyp, elin súıgen, eli súıgen azamat­tyń halqy úshin talaı tolǵan­ǵan jan kúızelisin birge sezingenin, Qazaqstannyń aı­nal­dyrǵan 19 jylda belgisiz el­den bedeldi memleketke aınalýyna Prezıdent Nursultan Nazarbaevtyń sińirgen erlikke toly eren eń­begin áserli áńgi­melep berdi. Jazýshy, Memlekettik syı­lyq­tyń laýreaty, «Mádenı mu­ra» jýr­nalynyń bas redak­tory Dú­ken­baı Dosjan referendým ótkizip, Prezıdenttiń ókilettigin 2020 jyl­ǵa deıin uzartý búgingi ýaqyt talabynan týyndap otyr­ǵanyn, Elba­sy­nyń álem bas­shylaryn aý­zyna qaratqan má­milegerlik, alys­ty boljaıtyn kóregendik qasıet­te­rin aı­ta kele, eń bastysy shy­ǵar­mashyl tulǵa ekendigin basa aıtty. Túrkolog ǵalym, tarıh ǵy­lymdarynyń doktory, Prezıdenttik mádenıet ortalyǵynyń bas ǵylymı qyz­metkeri Aıman Dosymbaeva Táýelsizdik jyl­dary­na deıin Qazaqstan ta­rıhy­na jáne túrkologııa ǵy­lymyna qatysty oqýlyqtardyń óte az bolǵan­dyǵyn, bolǵan kúnniń ózinde ǵylymnyń ózi saıasattyń quralyna aınalyp kelgenin atap ótti. Sondaı-aq búgingi kúni aqparat almasýdyń ashyqtyǵyn, postke­ńes­tik elderin aıtpaǵanda AQSh, Japonııa, Túrkııa elderi ǵalymdarymen erkin pikir alma­satyn zamanǵa jetip otyrǵa­ny­myzdy Elbasynyń eńbegimen baılanys­tyratynyn kóńilge qonymdy dáleldermen jetkizdi. Prezıdenttik mádenıet orta­ly­ǵy kitaphanasynyń shetel ádebıeti bóliminiń bastyǵy Tatıa­na Shevchenko Qazaqstan bú­ginde beıbitshiliktiń besigine aınal­ǵa­nyn, eńbek etemin degen adamǵa ultyna qaramaı bar­lyq jaǵdaıdyń jasalǵanyn, óziniń kóp bala tár­bıelep otyr­ǵan ana ekendigin, balalary men nemere­leriniń bolashaǵy úshin qazir­gi­deı qoı ústine boztor­ǵaı ju­myrt­qalaıtyn zamannyń jalǵa­sa bergenin qalaıtynyn aıtty. Qazaqstannyń eńbek sińirgen qaıratkeri, konserttik jáne teatr qyzmetiniń kórkemdik jetekshisi Sáý­lebek Asylhan Elba­synyń, ásirese, óner adam­daryna degen qamqorlyǵynyń erekshe ekendigin, búginde Astana naǵyz ónerdiń ordasyna aınalǵanyn, Prezıdenttik máde­nıet ortaly­ǵyn­daǵy Ulttyq dástúrler tea­try­nyń da Pre­zıdenttiń qol­daýy­nyń arqa­syn­da jemisti ju­mys jasap jatqanyn atap ótti. Qazaqstannyń eńbek sińirgen qaıratkeri, Prezıdenttik máde­nıet ortalyǵy Ulttyq dástúr­ler teatrynyń ánshisi Gúlzıra Bókeıhanqyzy Qazaqstan óz táýel­sizdigin alǵanda shette júr­­gen qandastardyń qata­ryn­da júregi jaryla qýanyp, al­ǵashqy lekpen atajurtqa kelgenin jáne ónerimen óz halqynyń qurmetine bólengenin aıtty. Aksııa qorytyndysynda Qa­zaq­stan Respýb­lı­ka­sy­nyń Tuń­ǵysh Prezıdenti – Elbasy Nur­sultan Nazar­baevtyń óki­let­ti­lik merzimin 2020 jylǵa deıin uzartýdy bir aýyz­dan qoldaý jóninde sheshim qabyldandy. «Egemen-aqparat».

Alańsyz jumys isteýge kepildik

«Atameken» odaǵy» Qazaqstannyń ulttyq ekonomıkalyq pa­latasy Demokratııalyq kúshterdiń «Qazaqstan-2020» jalpy­ult­­tyq koalısııasyna kiredi. Osy jaıynda keshe Ulttyq bas­pasóz-ortalyǵynda ótken baspasóz máslıhatynda A.Perýashev málim etti. Nursultan Nazarbaevtyń biz­diń jumysymyzdy tereń tú­sinýi­niń arqasynda júzdegen myń azamat óz isin bastaýǵa, óziniń jo­ba­lary men oılaryn júzege asyrý múmkindikterin paıdalana aldy. Kásipkerler, orta tap kez kelgen memlekettiń tireýi dep tegin sanalmaıdy. Bul adamdar óz jetistikterimen maqtana alady jáne neni kóziniń qarashyǵyndaı qor­ǵaı­tyndyǵyn biledi. Sondyqtan da referendým kezekti onjyl­dyq­ta alańsyz jumys isteýge kepil bola alady. «Qarapaıym adam­dar prezıdenttik Nazar­baev­qa emes, bizge, bizdiń elimiz ben bizdiń azamattarymyzǵa Prezıdent Nazarbaevtyń qajet ekendigin jaqsy túsinedi», – deıdi ká­sipkerler. Baspasóz máslıhatyna «Atameken» basshylyǵymen qa­tar, Máshıne jasaýshylar odaǵy basqar­ma­synyń tóraǵasy Meıram Pishembaev, Astyq odaǵynyń prezıdenti Nurlan Tileýbaev jáne Qarjy jáne salyq keńesshileri palatasynyń tóraıymy Ekaterına Nıkıtınskaıa, Qazaqstan Elek­tr-energetıkalyq qaýymdas­ty­ǵynyń tóraǵasy Sháımerden Orazalınov, Taý-ken óndirisi men metallýrgııa kásiporyndary qaýym­dastyǵynyń atqarýshy dırektory Tólegen Muqanov, Fermerler odaǵynyń vıse-prezıdenti Aqjol Abdýkalımov, Qurylysshylar oda­ǵynyń atqarýshy dırektory Altynaı Qusbekova, Qazaqstan hımııa ónerkásibi odaǵynyń atqa­rýshy dırektory Dinmuhamet Absemetov, Et odaǵynyń atqarýshy dırektory Ábjapar Isa jáne basqalar qatysty, dep habarlady «Atameken» odaǵy» UEP baspasóz qyzmeti.

Qorytyndy hattama bekitildi

Ortalyq saılaý komıssııasy elimizdiń respýblıkalyq refe­ren­dýmǵa qatysý quqyǵy bar, ony taǵaıyndaý týraly basta­ma­shy­lyq bildirgen elimizdiń azamat­ta­ry qoldarynyń ras­ty­ǵyn tekserý nátıjeleri týraly Qorytyndy hattamany bekitti. Sharaǵa Or­ta­lyq saılaý komıs­sııasynyń tór­aǵa­sy Qýandyq Turǵanqulov qa­tysty. Onyń aı­týynsha, Elba­sy­nyń ókilettigin uzartý jónindegi referendýmdy qoldaǵan 5 mln. 16 myń qol jı­nalǵan. – Zańnamaǵa sáıkes, refe­ren­dým­dy taǵaıyndaý týraly máse­le­ge bastamashylyq etý úshin bastamashy top músheleri bar­lyq oblystardy, Astana men Almaty qalalaryn teń mól­sher­de bildiretin keminde 200 myń azamattyń qo­lyn jınaýǵa tıis bolatyn. Iаǵnı, ár óńirden 12,5 myń qol jı­nalýy qajet bola­tyn. Zańnyń bul normasy toly­ǵymen oryn­dal­dy. Aımaqtyq saılaý ko­mıs­sııalarynyń ádilet organdarymen birlesip ótkizgen tekseris nátı­jesinde qoldardyń tıisti sany rastalyp otyr, – dedi OSK tóraǵasy. 13 qańtardaǵy jaǵdaı boı­yn­sha, OSK-ge barlyq oblystar men Astana jáne Almaty qala­la­rynyń saılaý komıssııa­lary­nan qoldardy tekserý nátı­je­leri týraly hattamalar kelip tú­sipti. «Respýblıkalyq referendým ót­kizý týraly basta­ma­ny qoldap bar­lyǵy 5 mln. 16 myń qol jı­nalǵan. Bul refe­ren­dýmǵa qatysý quqyǵy bar azamattardyń 55,2 paıyzy», – dedi Q.Turǵanqulov. Taǵy bir atap óterligi, aý­maq­tyq saılaý komıssııalary tek­seris nátıjesinde azamat­tar­dyń 194 jaramsyz qolyn anyqtaǵan. Jaramsyz dep tanýdyń negizgi sebepteri: óziniń qolyn qoıǵan azamattyń tirkelý ornynyń qol jınaý júrgizilgen óńirmen sáıkes kelmeýi, azamattar týraly máli­metterdi toltyrý barysynda jol berilgen tehnıkalyq qateler, qaı­talanǵan qoldardyń bolýy, ıaǵnı bir azamat qolynyń birneshe qol qoıý paraqtaryna qoıylýy, refe­ren­dýmǵa qatysý quqyǵy joq aza­mattardyń qolynyń bolýy (bul negizinen jasy 18-ge jetpegen tulǵa­lardyń qoldary), bir azamattyń barlyq otbasy músheleri úshin qol qoıýy. Buǵan qosa, «Respýb­lıkalyq referendým týraly» Konstı­tý­sııalyq zań talaptaryn buza oty­ryp toltyrylǵan qol qoıý paraq­tary jaramsyz dep tanyl­ǵan. «Degenmen, qoldardy jınaý boıynsha jumysty uıymdas­ty­rý­daǵy birqatar kemshilikterge qa­ra­mastan, referendým ótkizý týraly bastamashylyqty zańmen kózdel­gen­nen áldeqaıda kóp azamattar qoldady», – dedi qorytyndy só­zinde OSK tóraǵasy. Endi «Respýblıkalyq referendým týraly» Konstıtýsııalyq zań­nyń 16-baby 2-tarmaǵyna sáıkes, Qorytyndy hattama Qazaqstan Res­pýblıkasy Prezıdentine joldanatyn bolady. Láıla EDILQYZY.