Kásipkerlikti damytýǵa yqpaldy qoldaý

Astana qalasynyń ákimi Ádilbek Jaqsybekov pen «Damý» kásipkerlikti damytý qory» AQ basqarma tóraǵasy Qanysh Tóleýshın shaǵyn jáne orta kásipkerlikti qoldaý baǵdarlamasyn iske asyrýda yntymaqtastyq ornatý týraly memorandýmǵa qol qoıdy. Memorandým aıasynda ákimdik pen «Damý» qory shaǵyn jáne orta bıznes (ShOB) salasynda startap-jobalardy qoldaý jónindegi jańa baǵdarlamany júzege asyrýǵa 2 mlrd. teńge (árqaısysy 1 mlrd. teńgeden) bóletin boldy. Qarjy ekinshi deńgeıli bankter arqyly berilmek. Kásipkerliktiń joǵary áleýeti kez kelgen qalanyń ekonomıkasynyń ilgerileýiniń basty qozǵaýshy kúshi bolyp tabylady. Sondyqtan Astana qalasy ákimdigi qyzmetiniń basty mindetteriniń biri shaǵyn jáne orta bıznesti damytý men qoldaý bolyp otyr. Bul Memorandýmǵa Astana qalasy ákimdiginiń jáne «Atameken» Ulttyq kásipkerler palatasynyń elordalyq shaǵyn jáne orta bıznesti qarjylandyrý týraly aldyn ala kelisimi aıasynda qol jetkizildi. Qalada kásipkerlik ortany jetildirý boıynsha barlyq qajetti jaǵdaılar jasalýda. Memlekettik-jekemenshik áriptestik prınsıpterimen bıznes-ahýaldy jaqsartý boıynsha turaqty jumystar júrgizilýde. Búgingi kúni Astananyń JО́О́-degi ShOB-tyń úlesi 61 paıyzǵa jetken. Bul – jalpyrespýblıkalyq kórsetkishten úsh esege artyq. Astana nesıelerdi kepildendirý boıynsha res­pýblıka boıynsha birinshi orynda, sýbsıdııalaý boıynsha ekinshi orynda tur. Sonymen qatar, kásipkerlik sektorynda salyqtar esebinen túsetin túsimder de oń nátıjesin berýde. Qazirgi kezde qalalyq bıýdjetke túsetin salyqtyń 65 paıyzy elordalyq shaǵyn jáne orta bıznestiń úlesinde. ShOB salasynda startap-jobalardy qoldaý ıdeıasyn Astana qalasynyń Ulttyq kásipkerler palatasy ótkizgen dástúrli konferensııasynda elorda basshysy usynǵan bolatyn. Jańa baǵdarlamaǵa qoldanystaǵy memlekettik baǵdarlamalarǵa qatysý úshin qyzmeti ekonomıkanyń basymdy salalarynyń tizimine enbegen kásipkerler qatysa alady. Nesıeniń eń kóp somasy –50 mln. teńgege deıin. Syıaqy mólsherlemesi – jyl­dyq 7,9 paıyz, nesıe merzimi – 7 jyl­ǵa deıin. Jobalardy irikteýdi óńirlik Kásipkerler palatasy júzege asyrady. Osy oraıda aıta ketetin másele, qazirgi kezde elordada shaǵyn jáne orta bızneske qosymsha qoldaý kórsetý jáne damytý maqsatynda «Damý» qorymen birlesip 29 jasqa deıingi tulǵalar qatysa alatyn jas­tar kásipkerligin damy­tý baǵdarlamasy men saýda salasyn maqsatty nesıeleý boıynsha baǵ­darlamalar júzege asyrylýda. Atalǵan baǵdarlamalar boıynsha qarjyny ıgerý 100 paıyzdy qurady, olardy júzege asyrý jumystary odan ári jalǵasady. Ulan SANJAR.