«Qara rıeltordyń» isi sotqa jetti

Qazir jyljymaıtyn múlikpen saýda jasaıtyndar arasynda ańqaýlardy aldap soǵatyndar jıi kezdesedi. Páterin sondaı alaıaq­tar syrttaı satyp jibergen zeı­netker Tatıana Derevıanko bú­ginde zańnamalyq termınderdi bir zańgerdeı-aq biletin boldy. Bilmegende amaly qansha, basyndaǵy baspanasynan aıyrylyp qalyp, sońǵy eki jyldan beri shaqshadaı basy sharadaı bolyp, barmaǵan jeri, kirmegen esigi qalmaǵan. Onyń 2014 jyldan beri úıi joq deýge keledi. Istiń qalaı órbigenin jábirlenýshiniń ózi de áli túsindirip bere almaıdy. Ol páteriniń satylyp ketkenin qolynda dáleldi qujattary bar páterdiń jańa ıeleri kelip, «úıden shyq» degende bir-aq bilgen. Eń qyzyǵy, satý-satyp alý jónindegi kelisim qujatyna Tatıana Derevıanko qol qoıypty. – Notarıýs berdi degen senim­hat saraptamadan ótkizildi. Sarap­tamasyz-aq meniń qolym emes eke­ni kórinip tur, – deıdi Tatıana Derevıanko. Alaıaq rıeltorlar oılaǵandaı, bas­panasyz qalǵan zeınetker aýzy ańqıyp qala bermedi. Shyndyqqa jetý úshin tabandylyqpen sońyna tústi, eki jyldan beri tergeý amaldary júrgizildi. Osy ýaqyt ishinde tergeýshi 5 ret aýystyryldy. Jábirlenýshi búginde istiń sotqa jetkenine «ótirik pe, shyn ba» dep, shúkirshilik etip otyr. Jaqynda polıseıler kúdiktini qolǵa túsirdi. Páter satýdyń aılaly jolyn jasaǵan alaıaq Rahat Qutlymuratov degen jas jigit eken. Oǵan bes túrli qylmystyq aıyp taǵyldy. Aryn beline býǵan beıbaqtan alaıaqtyq ta, buzaqylyq ta, qaraqshylyq ta qalmapty. Jalǵyzilikti zeınetkerdiń adal mań­daıterimen tapqan baspanasyn olja­laǵan alaıaq jalǵyz emes eken. Onyń eki sybaılasy da endi sot aldynda jaýap beretin bolady. Názıra JÁRIMBETOVA, «Egemen Qazaqstan». QOSTANAI.