Eýropalyq odaq BUU Qaýipsizdik keńesiniń 2016 jyldyń 2 naýryzynda qabyldaǵan qararyna sáıkes, Soltústik Koreıaǵa qatysty sanksııalar aýqymyn kóbeıtti. Bul jóninde Eýroodaq taratqan kommıýnıkede aıtylǵan.
Eýropalyq odaqtyń habarlamasynda osyǵan baılanysty: «2016 jyldyń 31 naýryzynda Eýroodaq BUU Qaýipsizdik keńesiniń 2016 jyldyń 2 naýryzynda qabyldaǵan №2270 qararyna sáıkes, KHDR-ǵa qarsy shekteý sharalaryn keńeıtti», – delingen. Sanksııa Soltústik Koreıanyń qarýly kúshteriniń jaýyngerlik múmkindikterin damytýǵa úles qosa alatyn kez kelgen zattardyń (azyq-túlik pen dári-dármekten basqa) eksporty men ımportyna tyıym salýdy kózdeıdi. Osy qujat Eýroodaqqa múshe elderdi Soltústik Koreıaǵa jetkiziletin barlyq júkterde tyıym salynǵan taýarlar men tehnologııalardyń bolmaýyn tekserýge, sondaı-aq, áýe jáne teńiz kemeleriniń júkterine tyıym salýǵa, olardy tirkemeýge mindetteıdi.
Jyldyq paıdasy – 30 mıllıard dollar
Álemdik aqparat agenttikteriniń habarlaýyna qaraǵanda, kokaındy Eýropaǵa astyrtyn jetkizýmen aınalysatyn ıtalııalyq «Landrangeta» dep atalatyn qylmystyq toby jylyna 30 mıllıard dollar paıda tabady. Bul álemdik esirtki bıznesiniń altydan bir bóligi eken.
Básekelesterinen ozyp turǵan bul qylmystyq toptyń músheleri meksıkalyq jáne kolýmbııalyq esirtki satýshylardyń senimine kirgen kórinedi. Agenttikterdiń aqparattary boıynsha, Italııanyń eń iri Djona Taýro portyna táýligine shamamen 8 myńdaı júk konteıneri keledi. Tártip saqshylary osynshama konteınerdiń árbirin tekserip shyǵý múmkin emes ekendigin aıtady. Al Italııa bıligi esirtki bıznesimen kúresý úshin jyl saıyn 2,5 mıllıard eýro jumsaıdy eken.
Basty kúdikti Fransııaǵa ekstradısııalanady
Belgııanyń bıligi ótken jyldyń 13 qarashasynda Parıjde bolǵan terrorlyq aktilerge basty kúdikti retinde ustalǵan Salah Abdeslamdy Fransııaǵa ekstradısııalaýǵa sheshim qabyldady.
Belgııa memlekettik prokýrorynyń habardar etýinshe, S.Abdeslamdy Fransııa eline tapsyrýǵa ruqsat etilgen. Tórt aıǵa jýyq boı tasalap júrgen terrorshy 18 naýryz kúni Brıýsselde ustalǵan edi. Oǵan Parıjde 130 adamnyń ómirin jalmaǵan terrorlyq shabýyldardy josparlap, ony júzege asyrýǵa yqpal etti degen aıyp taǵylyp otyr. Teraktilerge jaýapkershilikti «Islam memleketi» ekstremıstik uıymy moınyna alǵan bolatyn. Al Abdeslamnyń advokaty Sedrık Moıs kúdiktiniń Fransııa bıligimen «yntymaqtasqysy» keletinin málimdedi. Fransııanyń ádilet mınıstri Jan-Jak Ýrvoanyń málimdeýinshe, basqadaı bir «tótenshe oqıǵa» bola qalmasa, S.Abdeslam aldaǵy 10 kún ishinde ekstradısııalanady.
Qysqa qaıyryp aıtqanda:
- Sońǵy 40 jylda álemde artyq salmaǵy bar eresek adamdardyń sany 105 mıllıonnan 641 mıllıonǵa deıin ósken. Eger jaǵdaı ári qaraı jalǵasa berse, 2025 jylǵa qaraı salmaǵy artyq er adamdardyń úlesi 18 paıyzdy, al áıelderdiń úlesi 21 paıyzdy quraıdy eken. Artyq salmaqtylardyń «kóshin» Qytaı men AQSh bastap tur.
- Vetnamnyń ulttyq jınalysynda daýys berý nátıjesi boıynsha el prezıdenti Chyong Tan Shang qyzmetinen bosatyldy. Jınalysqa qatysqan 473 depýtattyń 447-si oǵan qarsy daýys bergen.
- Lıvan qaýipsizdik kúshteriniń qyzmetkerleri elde adam saýdasymen aınalysatyn iri qylmystyq topty talqandady jáne kámelettik jasqa tolmaǵan 75 qyz balany quldyq zorlyq-zombylyqtan bosatty.
- AQSh-tyń Mıssısıpı shtatynda «qydyrýǵa» jiberilgen ıt óziniń ıesine ishinde jarty kılo esirtki bar paket ákelgen. Ittiń ıesi ony jergilikti polısııa bólimshesine aparyp bergen, olar osy oqıǵaǵa baılanysty tekserý júrgizip jatyr.
Ekstremıstermen kúres máselesin talqylady
«Reıter» aqparat agenttiginiń habarlaýynsha, AQSh prezıdenti Barak Obama Vashıngtonda Iаdrolyq qaýipsizdik jónindegi sammıt kezinde Túrkııa prezıdenti Rejep Taıyp Erdoǵanmen kezdesken.
Kezdesýde taraptar «Islam memleketi» ekstremıstik toptarymen kúresti kúsheıtýge qatysty máselelerdi talqylaǵan. Sondaı-aq, Barak Obama Túrkııa basshysyna ondaǵan adam ómirin qıǵan Dııarbaqyrda oryn alǵan terrorlyq aktilerge baılanysty kóńil aıtqan jáne AQSh Túrkııanyń qaýipsizdigine qoldaý bildiretinin atap ótken. Aıta keteıik, sońǵy kezde AQSh pen Túrkııa arasynda keıbir máselelerge baılanysty ózara túsinispeýshilik kórinis berdi. Negizinen ol Vashıngtonnyń Sırııada ekstremıstermen kúresip júrgen kúrd jasaqtaryna qoldaý kórsetýine qatysty. Buǵan Ankara burynnan-aq qarsy.
Saılaý ótkizýge kelisetin syńaıly
Sırııa prezıdenti Bashar Asad, eger Sırııa halqy merziminen buryn saılaý ótkizýdi qalaıtyn bolsa, onda buǵan óziniń kelisim beretinin málimdedi. Bul málimdemeni ol «Novostı» aqparat agenttigine bergen suhbaty barysynda jasaǵan.
«Birqatar oppozısııalyq kúshter emes, halyq óz erkimen saılaý ótkizýdi qalaıtyn bolsa, ol men úshin problema emes, – depti prezıdent osy másele jóninde. – Mundaı qadamǵa barý úshin bizge prezıdenttiń nemese úkimettiń pikiri emes, Sırııadaǵy qoǵamnyń pikiri qajet». Sırııa basshysynyń pikirinshe, memleket basshysy azamattardyń tikeleı daýys berýi arqyly saılanýy tıis. Suhbat barysynda Bashar Asad ýaqytsha beıbit kelisimge de toqtalyp ótken. Onyń sózine qaraǵanda, ýaqytsha kelisimge kelýdi qol jetkizilgen tabys dep baǵalaýǵa bolady.
Ushqyshty óltirdi degen kúdikti ustaldy
Túrkııanyń polısııasy Izmırde Reseıdiń Sý-24 ushaǵynyń ushqyshy Oleg Peshkovtyń ólimine sebepshi dep tanylǵan Alparslan Chelıktiń ustalǵany týraly aqparatty rastady.
«Novostı» agenttigi taratqan aqparatqa qaraǵanda polısııa ókili A.Chelıktiń qazirgi kezde qamaýda otyrǵanyn ǵana aıtqan. Keıbir málimetter onyń 31 naýryz kúni tutqynǵa alynǵanyn, al operasııa 30 naýryzda keshkisin Izmır qalasyndaǵy bir meıramhanada júzege asyrylǵanyn kórsetedi. Chelıkpen birge 15 adam ustalǵan. Kúdiktilerden Kalashnıkov avtomaty, eki tapansha jáne oqtar alynǵan.
Internet materıaldary negizinde ázirlendi.
