Jarystar jańǵyryǵy

Velosport. Astana komandasynyń velosportshysy Dıego Rosa qolyna velosıped ustap márege jaıaý keldi. Ol «Bask eliniń týry» jarysynyń besinshi kezeńin jeńip aldy. Márege sanaýly sekýndtar qalǵanda Dıego Rosa velosıpedten túsip, ony qolyna alyp, máre syzyǵyn basyp ótti. Sol jerde velosıpedti basynan asyryp, silkilegen sportshyǵa jankúıerler qoshemet kórsetti. Týrdyń besinshi kezeńinde márege ekinshi bolyp 3 mınýttan keıin kolýmbııalyq Serhıo Enao jetti. Fýtbol. Senbi kúni Qazaqstan premer-lıgasynyń 4 týry ótti. Osy týrda «Qaırat» jańa bas jat­tyq­tyrýshy grýzııalyq maman Kahaber Shadadzeniń jetek­shiligimen birinshi jeńisine jetti. Almaty komandasy syrt alańda «Atyraýdy» 1:0 esebimen utty. Al,  Qazaqstan Sýperkýbogy úshin matchta «Qaırattan» jeńilgen «Astana» áli jeńilmeı keledi. Komanda tórt oıynnyń bárinde qarsylastaryn jeńdi. Sońǵy týrda astanalyqtar óz alańynda «Tarazdan» 2:1 esebimen basym tústi. Chempıonatta taǵy jeńilmeı kele jatqan komandanyń biri – Pavlodardyń «Ertis» klýby da jeńiske jetti. Olar Qaraǵandyda «Shahterdi» 2:0 esebimen utty. Qazir týrnır kestesinde «Astana» men «Ertis» 12 upaıdan alyp, top bastap keledi. 4 týrda basqa matchtar mynadaı eseppen aıaqtaldy:  «Ordabasy» (Shymkent) – «Tobyl» (Qostanaı) 2:2, «Aqjaıyq» (Oral) – «Oqjet­pes» (Kók­shetaý) 0:2, «Atyraý» (Atyraý) – «Qaı­rat» (Al­ma­­ty) 0:1, «Aqtóbe» (Aqtóbe) – «Jetisý» (Taldyqorǵan) 3:2. Hokkeı. Qazaqstannyń áıelder qurama komandasy Italııanyń Azıago qalasynda ótken álem chem­pıonatynyń birinshi dıvızıonynda úshinshi oryn aldy. Qazaqstan «V» tobynda Italııa, Vengrııa, Latvııa, Qytaı, Nıderland quramalarymen kezdesti. Otandas­tarymyz sońǵy matchta alań ıelerimen  oınap, 1:1 esebi­men teń tústi.  Osy topta birinshi oryndy Vengrııa hokkeı­shileri jeńip aldy. Qazaqstan Qytaı men Nıder­landty jeńip, úsheýinde utylyp qaldy. «V» tobynda birinshi oryn alǵan Vengrııa «A» tobyna shyqty. Al, «A» tobynyń jeńimpazy Germanııa kelesi jyly top-dıvızıonda oınaıtyn bolady. Basketbol. «Astana» komandasy VTB biryńǵaı lıgasynda jetinshi jeńisine jetti. Komanda syrt alańda Grýzııanyń «Vıtý» klýbymen kezdesip, 62:53 (15:22, 16:8, 23:9, 8:14) esebimen utty. Buǵan deıin «Astana» qatarynan 12 ret jeńilgen bolatyn. Qazir Qazaqstan komandasy týrnır kestesinde 16 klýbtyń arasynda 15-orynda kele jatyr. Sońǵy orynda «Astanadan» utylǵan Tbılısıdiń «Vıta» komandasy tur. «Egemen-aqparat».