Múmkindigi shekteýli balalar

úshin atom jobasy aıasyndaǵy tıimdi is-sharalar jalǵasýda Elbasynyń bastamasymen qolǵa alynǵan ATOM jobasy aıasynda Semeı polıgonynan zardap shekken turǵyndardyń densaýlyqtaryn saýyqtyrý sharalary júzege asyrylýda. Osyǵan oraı, Shyǵys Qazaqstan oblysyndaǵy BUU birlesken baǵdarlamasynyń basty maqsattarynyń biri múmkindigi shekteýli jandarǵa áleýmettik qyzmetterdi qoljetimdi etý úshin Semeıdegi jalpy bilim beretin №20 jáne №4 mektepterinde múmkindigi shekteýli balalarǵa arnalǵan modýldi alańdar ashyldy. Atalǵan jobalardy BUU-nyń qarjylaı qoldaýymen «Quqyqtyq sana akademııasy» men «Erekshe álem» qoǵamdyq qory júzege asyryp otyr. Ondaǵy maqsat oqytý men tárbıeleýde qıyndyq týdyratyn balalarǵa tıimdi emdeý-saýyqtyrý jáne psıhologııalyq-pedagogıkalyq kómek kórsetý bolyp tabylady. Máselen, №20 jalpy bilim beretin mektepte múmkindigi shekteýli balalarǵa arnalǵan korreksııalyq synyp ashyldy. «Quqyqtyq sana akademııasy» qoǵamdyq qory júzege asyrǵan joba aıasynda sóıleý qabileti men psıhologııalyq damýy tómen balalarǵa arnalǵan eki synyp paıdalanýǵa berildi. Al №4 jalpy bilim beretin orta mektepte 12 balaǵa arnalǵan korreksııalyq synyp esik ashty. Synypta sóıleý qabileti tómen, aýtızm dertine shaldyqqan balalar oqıdy. Zaman talabyna oraı áleýmettik ortaǵa beıimdeýge, oqytýǵa jaǵdaı jasaı­dy. BUU joba menedjeri Raýan Qalıevtiń aıtýynsha, jaqsy iske Semeı qalalyq ákimdigi, bilim bólimi sebepker bolypty. – Aýtızm syrqatyna ushyraǵan balalardy óner salasyna, túrli tehnıkaǵa úıretse, aldaǵy ýaqyt­­ta olardan sol salanyń jaqsy mama­ny shyǵýy múmkin. Eger bala­ny erte jastan emdep tárbıelegen jaǵ­daıda, jeti jasynda qarapaıym bala­larmen sabaqqa da bara alady. О́kinishke qaraı, qalamyzda ondaı ortalyqtar joq. Bizdiń qor qazir mektep jasyna deıingi bala­lar­men aınalysatyn ortalyq ashý­dy josparlap otyr. Osy baǵyt­ta jumystar atqarylýda, – deı­di «Erekshe álem» qoǵamdyq qory­nyń dırektory Araılym Álim­janova. – Bul jobalardyń maqsaty – múmkindigi shekteýli balalardy qoǵamǵa beıimdeý jáne alǵashqy bilim alýlaryna tolyqtaı múmkindik jasaý. Búgingi tańda jetken jetistikterimiz kóp. Sebebi, osyndaı korreksııalyq synyptan jalpy synypqa aýysyp jatqan balalar bar. Ol biz aıtyp otyrǵan áleýmettendirý máselesiniń oń sheshilip jatqanyn kórsetedi. Bul jumystar aldaǵy ýaqytta da jalǵasatyn bolady. Korreksııalyq túzetý synyptarynda arnaıy muǵalimdermen qatar, psıhologtar men logopetter de jumys júrgizetin bolady. Olar qajet bolǵan jaǵ­daıda aýtızmge shaldyqqan bala­lardy tórt jylǵa deıin tár­bıelemek. Bala ashylyp, jaqsy kór­set­kish kórsetse, birden kádimgi synyp­tarǵa aýysýǵa múmkindik bar. Raýshan Nuǵmanbekova. SEMEI.