Qazaqstan sportshysy álem rekordyn qatarynan úsh ret jańartty

ASTANA. 12 sáýir. Gollandııanyń Eındhoven qalasynda ótken dástúrli «Swim Cup EINDHOVEN» jarysynda júzý sportynan qazaqstandyq paralımpıalyq sportshy Zúlfııa Ǵabıdýllına álem rekordyn qatarynan úsh ret jańartty. Bul týraly egemen.kz tilshisi habarlady. Osy jetistigimen ony Mádenıet jáne sport mınıstri Arystanbek Muhamedıuly quttyqtady. Mınıstr paralımpıalyq sportshyny álem rekordyn qatarynan úsh ret jańartýymen shyn júrekten quttyqtaı otyryp, onyń joǵary kórsetkishteri naǵyz erlik ekendigin atap ótti. «Bul jetistigińiz beıbit elimizdiń azamaty retinde jasaǵan eren erligińiz dep bilemin. Sizdiń enshińizde osymen 6 álem rekordy bar. Qazirgi tańda 50, 100 jáne 200 metrge erkin ádispen júzýde álemdik reıtıngte sizdiń kósh bastap turýyńyz – biz úshin zor maqtanysh. Taǵdyrdyń tezine qaısar minez tanytyp, kópke úlgi bolarlyqtaı erlik jasap kelesiz. Rıo-de-Janeıro qalasynda ótetin aldaǵy XV Paralımpııa oıyndarynda sizge sáttilik tilegim keledi! Bul jeńisterińiz jańa jetistikterge ulasa bersin!», dep jazdy mınıstr quttyqtaýynda. Zúlfııa Ǵabıdýllına aldymen 50 metr qashyqtyqty jartylaı fınalda 44.99 sekýnd ýaqytta júzip, birinshi rekordyn ornatty. Araǵa kóp ýaqyt salmaı, fınalda erkin júzý ádisimen osy qashyqtyqta jańa álem rekordyn jasady. Ol 44.17 sekýnd ýaqytta júzip, birinshi oryndy jeńip aldy. Keıin 100 metr qashyqtyqty 01:34.86 ýaqytta júzip, álem rekordyn taǵy bir márte jańartty. Sondaı-aq, Zúlfııa Ǵabıdýllına erkin ádispen júzý boıynsha 200 metr qashyqtyqta da aldyna jan salmaı taǵy da márege birinshi bolyp jetti. Zúlfııa Ǵabıdýllına osyǵan deıin Rıo-de-Janeıroda ótetin XV Paralımpııa oıyndaryna lısenzııa alǵan bolatyn. Qazirgi kezde Zúlfııa Ǵabıdýllına osy 3 qashyqtyqtarda (50, 100, 200 metr) álemdik reıtıngte kósh bastap tur. Dastan Kenjalın. Derek, foto: Mádenıet jáne sport mınıstrligi.