ASTANA. 12 sáýir. 23 sáýir kúni boksshylar Gennadıı Golovkın men Domınık Ýeıd sharshy alańda kezdesedi. Bul týraly egemen.kz tilshisi habarlady.
Bul jekpe-jekti «Qazaqstan» telearnasy 24 sáýir kúni Astana ýaqytymen saǵat 07.20-tan bastap tikeleı efırde kórsetedi. Sondaı-aq, kezdesý kaztrk.kz saıtynda tikeleı efırde kórsetiledi. Kezdesý AQSh-tyń Los-Andjeles qalasyndaǵy «Forým» arenasynda ótedi.
Gennadıı Golovkın – WBA (Super), IBO, WBC (Interim) jáne IBF tujyrymdary boıynsha orta salmaqtaǵy álem chempıony. Ol áýesqoı boksta 350 kezdesý ótkizip, 345 jekpe-jeginde jeńiske jetken. 2000 jylǵy jastar jáne 2003 jylǵy eresekter arasyndaǵy álem chempıony, 2002 jylǵy Azııa oıyndary men 2004 jylǵy Azııa chempıony. Sondaı-aq, 2004 jylǵy Afına Olımpıadasynyń kúmis júldegeri. Golovkın kásipqoı boksta 34 kezdesý ótkizip, sonyń bárinde jeńiske jetken. 31 jekpe-jegin nokaýtpen aıaqtaǵan. Amerıkalyq boksshy Domınık Ýeıdke 18 ret rıngke kóterilip, sonyń barlyǵynda jeńse, 12 kezdesýdi merziminen buryn utqan. Ol sońǵy kezdesýin byltyr 26 maýsymda avstralııalyq boksshy Sem Solımanǵa qarsy ótkizip, jeńiske jetti.
Gennadııdiń osyǵan deıin avstralııalyq Denıel Gıl, meksıkalyq Marko Antonıo Rýbıo, amerıkalyq Vıllı Monro II men Stıven Kertıs jáne kanadalyq Davıd Leme sekildi boksshylarmen judyryqtasyp, jeńgenin bilemiz.
Gennadıı Golovkın sońǵy jekpe-jegin 2015 jyldyń 18 qazany kúni kanadalyq Davıd Lemege qarsy ótkizip, 8-raýndta nokaýtpen utqan. Bul kezdesýdi de «Qazaqstan» ulttyq telearnasy tikeleı efırde kórsetti.
Golovkın men Leme jekpe-jegine HBO telearnasy aqyly túrde Pay-Per-View júıesimen kórsetip, 150 myńnan astam abonement satyldy. Bul AQSh-ta jekpe-jek ótkizgen shetel azamaty úshin jaqsy kórsetkish sanalady.
Al otandastary úshin Golovkın-Leme kezdesýin 3,5 mıllıon qazaqstandyq jankúıerler demalys kúni ekenine qaramastan «Qazaqstan» ulttyq telearnasynan tamashalaǵan. Sondaı-aq, osy kezdesýdi 1 mln. kórermen telearnanyń resmı www.kaztrk.kz saıtynan kórgen. Al, jekpe-jektiń qaıtalaýyn 1,5 mıllıonnan asa jankúıer qaraǵan.
24 sáýirde «Qazaqstan» telearnasy saǵat 15.00 jáne 19.00- de Golovkınniń Ýeıdke jekpe-jegin qaıtalap kórsetedi. Al «Kazsport» telearnasy men kazsporttv.kz saıty 24 sáýirde 23.15-te, 25 sáýirde saǵat 09.00-de, 22.00-de jáne 1 mamyrda saǵat 23.00-de jekpe-jekti qaıtalap kórsetedi.
Dastan Kenjalın.
Derek, foto: «Qazaqstan» RTRK» AQ.
