Elimiz «Qazaqstan-2050» Strategııasy boıynsha, ıaǵnı Elbasymyz aıqyndaǵan uzaq merzimdi jospar boıynsha jumys isteýde. HHI ǵasyrdyń ózindik erekshelikteri kóp. Solardyń biri – strategııalyq josparlaýdyń ózekti qaǵıda bolyp sanalatyndyǵy. Sondyqtan da «Qazaqstan-2050» Strategııasy aıqyn shamshyraq sekildi basty maqsatymyzdan kóz jazbaı, alǵa jyljýymyzǵa, júıeli jumys isteýimizge múmkindik berip keledi.
Prezıdentimiz sol basty baǵdarlamanyń ózinde-aq HHI ǵasyrdyń basty-basty on syn-qaterin atap kórsetken bolatyn. Jahandyq daǵdarystyń birte-birte kóptegen qıyndyqtar ákeletinin de Memleket basshysy aldyn ala boljaı bildi. Sóıtip, áleýmettik saıasattyń jańa qaǵıdalaryn aıqyndap, naqtylap berdi. Al 2014 jylǵy 17 qańtardaǵy Joldaýynda Elbasymyz damyǵan 30 eldiń qataryna kirý josparyn usyndy. Sonymen birge, Máńgilik El ıdeıasy men ıdeologııasyn kóldeneń tartty.
Búkil álemde kúrdeli jaǵdaılar týyndap, jahandyq daǵdarys dendep kele jatqanda, bizdiń Kóshbasshymyzdyń jańa usynystarǵa, Máńgilik El murattaryna batyl qadam jasaýy asa qıyn da kúrdeli jyldarda astanamyzdy Arqa tósine kóshirý týraly batyrlyq bastamasyna barabar ekeni belgili. «Bizder, qazaqstandyqtar – bir halyqpyz! Biz úshin ortaq taǵdyr – bul bizdiń Máńgilik El, laıyqty ári uly Qazaqstan! Máńgilik El – jalpyqazaqstandyq ortaq shańyraǵymyzdyń ulttyq ıdeıasy. Babalarymyzdyń armany», – dedi Prezıdentimiz «Qazaqstan joly – 2050: bir maqsat, bir múdde, bir bolashaq» atty Joldaýynda.
Jańa Joldaý – jańa jahandyq jaǵdaıǵa jaýap ekenin búkil elimizdiń jurtshylyǵy sııaqty ońtústik óńiriniń 200 myńnan astam ardageri de tereń túsinedi.
«Bul joly Qazaqstan daǵdarysqa qarsy aldyn alý strategııasyn alǵash ret qoldanyp otyr», – deı kele, Elbasymyz, birinshiden, qazirdiń ózinde ındýstrııalyq-ınnovasııalyq damýdyń ekinshi besjyldyǵyn bastaǵanymyzdy, ekinshiden, «Nurly Jol» memlekettik ınfraqurylymdyq damý baǵdarlamasyn qabyldaǵanymyzdy, úshinshiden, «5 ınstıtýttyq reformany júzege asyrý boıynsha 100 naqty qadam» Ult Josparyn júzege asyryp jatqanymyzdy, tórtinshiden, qajetti memlekettik qor men altyn-valıýta rezervin jınaqtaǵanymyzdy, besinshiden, munaı baǵasynyń tómendegen jaǵdaıynda oılastyrylǵan is-qımyldar nusqasy ázirlengenin, altynshydan, Qazaqstanda ınnovasııalyq ındýstrııalandyrý sheńberinde qurylǵan ekonomıkalyq jańa sektorlary ekonomıkalyq ósimniń draıverlerine aınalýda ekenin, jetinshiden, qazaqstandyqtardyń ekonomıkalyq minez-qulyqtary ózgergenin, eńbek ónimdiliginiń 60 paıyzdan astamǵa artqanyn aıqyn dálelge keltirdi.
Ekonomıkalyq minez-qulqymyzben birge, ózge de baǵyt-baǵdarlardaǵy psıhologııamyzdyń jańaryp, jańǵyryp jatqany anyq. Sebebi, biz – bastamashyl, jańashyl, tek óz elimizde ǵana emes, búkil álem deńgeıinde danalyq bastamashylyǵymen aıryqshalanatyn Kóshbasshymyzdyń bastaýymen Máńgilik El murattaryna umtylǵan Uly Dalanyń halqymyz.
Ońtústik óńirindegi qandaı da bir ardagermen pikirlesseńiz de, osynaý jaǵdaılardy aıtady. Jańa Joldaýdaǵy qaǵıdalarǵa rızalyǵyn bildiredi. Máselen, Memleketimizdiń basshysy qandaı qıyn jaǵdaıda da memleket óziniń áleýmettik mindettemelerin shashaý shyǵarmaı oryndap kele jatqanyn jáne oryndaı beretinin atap kórsetti. Jańa Joldaýdyń aty aıtyp turǵandaı, Elbasy bizdiń daǵdarysqa qarsy basty strategııamyzdyń úsh qarapaıym, biraq mańyzdy – ósim, reformalar, damý uǵymdarymen úndes ekenin erekshelep berdi.
Nursultan Ábishuly jańa áleýmettik saıasat jasaý mindetin qoıyp otyr. Memlekettiń áleýmettik saladaǵy róli álsiz qorǵalǵan azamattardy qoldaýmen jáne adam kapıtalyna ınvestısııalardy qamtamasyz etýmen shekteletin bolady. Ataýly áleýmettik qoldaý tek muqtaj adamdarǵa, olardyń naqty tabystary men ómir súrý jaǵdaıyn baǵamdaý negizinde kórsetiletin bolady. Basqalar aqshany ózderi, ózderiniń eńbekterimen tabýy tıis.
Prezıdent aıtqandaı, Qazaqstan halqy, bizdiń ultymyz eshýaqytta da dál qazirgi sııaqty baqýatty turmys keship kórgen joq. Táýelsizdik alǵan ýaqyttan beri Qazaqstanda 1300-den astam densaýlyq saqtaý nysany men 1700-den astam bilim berý oshaǵynyń salynýy kóp nárseni ańǵartady. Asa kúrdeli operasııalardy óz elimizde, óz dárigerlerimiz jasaıtyn jaǵdaıǵa jettik. Jalpy halyq turmysynyń, densaýlyǵynyń túzelýi, sanynyń ósýi nátıjesinde qazaqstandyqtardyń ortasha ómir uzaqtyǵy 72 jasqa jýyqtady.
Jańa jyldan bastap bıýdjet qyzmetkerleriniń jalaqysy, áleýmettik járdemaqylar men shákirtaqy ortasha alǵanda 30 paıyzǵa deıin kóbeıdi. Qoǵamymyz, elimiz, onyń ishinde Ońtústik Qazaqstannyń jurtshylyǵy memleket damýynyń bolashaǵyn aıqyn sezinedi. Qandaı daǵdarystarǵa da, syn-qaterlerge de Elbasynyń dana saıasatymen, syndarly basshylyǵymen, joǵary jaýapkershilikpen, yntymaqpen, birlikpen, eńbeksúıgishtikpen jaýap qaıtaratyn bolamyz.
Oblysymyzda jańarý, jańǵyrý, ósim men damý, reformalar oıdaǵydaı atqarylýda. Jaqynda bir basqosýda oblys ákimi Beıbit Atamqulovtyń: «Bizdiń osyndaı laýazymdy qyzmette otyrǵanymyz – qarapaıym halyqtyń arqasy. Sondyqtan, árbirimizdiń mindetimiz buqarany basqarý ǵana emes, kerisinshe, oǵan qyzmet etý ekenin umytpaýǵa tıispiz», – degenin ardagerlerimiz rızalyqpen aıtyp júr.
Ońtústik óńirinde qazirgideı qıyn, kúrdeli jaǵdaılardyń ózinde barlyq salada ósim bar, damý bar. О́nerkásip óniminiń jalpy kólemi 2015 jyldyń qorytyndysy boıynsha 668 351,5 mln. teńgeni qurady. Bul burynǵy, bir jyl ilgeridegi kórsetkishten edáýir artyq. Sondaı-aq, aýyl sharýashylyǵy óniminiń jalpy kólemi de 344 645,1 mln. teńgege jetip otyr. Eginshilikte, mal ósirý baǵyttarynda ónimdi molaıtýmen birge, ony saqtaýda jáne óńdeýde jańalyqtar óte kóp. Indýstrııalyq-ınnovasııalyq jáne ınvestısııalyq izdenister jan-jaqty júrip jatyr. Júk tasymaldaý, qurylys, turǵyn úıler salý, taýar aınalymy, áleýmettik salalar sapasy, jumys oryndaryn kóbeıtý jónindegi kórsetkishter de qýantady.
Oblystyq ardagerler keńesi oblys ákimi janyndaǵy «Yrys aldy – yntymaq» qoǵamdyq forýmymen, sondaı-aq, oblystyq «Ájeler alqasymen», basqa da qoǵamdyq uıymdarmen, birlestiktermen, jastar ortalyqtarymen, árıne, atqarýshy, ókiletti, quqyqtyq, t.b. organdarmen tyǵyz birlikte jumys júrgizedi. Jańa Joldaýdy, N.Á.Nazarbaevtyń «Ult Jospary – qazaqstandyq armanǵa bastaıtyn jol» atty baǵdarlamalyq maqalasyn, Parlament Májilisi men barlyq deńgeıdegi máslıhattar saılaýlaryna baılanysty halyqqa arnaǵan úndeýin jan-jaqty túsindirýdemiz.
Ulysymyzdyń uıytqysy Ońtústikte árbir ardager de, orta býyn ókilderi de, jalyndy jastar da Elbasynyń: «Men halqyma senemin!» – degen tolqynysty, tebirenisti sózine: «Biz Prezıdentimizdi qoldaımyz!» – dep jaýap beredi.
Jeńisbek MÁÝLENQULOV,
Ońtústik Qazaqstan oblystyq ardagerler keńesiniń tóraǵasy
ShYMKENT
