Olja tapqan oqýshylar

adaldyqtyń úlgisin kórsetti Saıram aýdanyndaǵy № 26 M.Qashqarı atyndaǵy mekteptiń ataǵy áp-sátte aspandap shyǵa keldi. Tańǵalǵandary da, tamsanǵandary da jeterlik. Tipten, ózge mekteptiń muǵalimderi óz oqýshylaryna M.Qashqarı atyndaǵy mektepti úlgi etip, sol mekteptiń oqýshylaryndaı adal bolýǵa, tárbıeli de, oqýda ozat bolýǵa sha­qyryp jatty. Shalǵaıdaǵy mekteptiń bir sátte bulaısha abyroıly bola qalýy kúni keshe ótken saılaýda mektep dırektorynyń basym daýyspen aýdandyq máslıhatqa depýtat bolyp saılanǵany emes, dál osy mektepte oqıtyn eki oqýshynyń qomaqty qarjy taýyp alyp, ony ıelerine qaıtarýy bolatyn. Sol kúni mektepten qaıtqan oqýshylardyń oılarynda túk joq edi. Oqý úlgerimderi jaqsy, tártipteri úlgili eki oqýshy erteńgi bolatyn sabaq barysy týraly oı bólisip kele jatqan. Kenet, jol jıeginde jatqan ámııandy baıqap qalǵan olar ashyp kórgende, óz kózderine ózderi senbedi. Bir býma kileń 10 myńdyq teńgelerdi kórip, abdyrap qalǵandary ras edi. Otyra qalyp sanady, tup-týra 1 mıllıon 50 myń teńge! Tez sheshim qabyldandy. Qalaıda qarjynyń ıesin taýyp, qaıtarý kerek. Osy sheshimge toqtalǵan oqýshylar kóp uzamaı-aq joq izdeýshini tapty. Ol – belgili kásipker, aýyl azamaty eken. Kásipkerdiń aıtýynsha, qarjysyn joǵaltqan kúni Shymkentten qajetti taýarlar alý úshin tańerteń 1 mıllıon 50 myń teńge alyp shy­­ǵyp, ony túsirip alǵanyn baıqamaǵan. Qar­jysynyń joq ekenin bilgende san soǵyp, qaıdan izderin bilmeı turǵanda... Joǵaltqany aldynan shyqty. Alǵash sengen joq, 2 oqýshy joǵyn qaıtarǵanda mundaı adaldyqty tipten oılamaǵan otaǵasy oqýshylardy qushaqtap, súıe berse kerek. Saıram aýdandyq ishki ister bólimi jer­gilikti polısııa qyzmetiniń basshylyǵy M.Qash­qarı atyndaǵy mekteptiń oqýshylary Tahırjan Ýrmanov pen Ábdinábı Ahmedovti arnaıy izdep kelip, basqarmanyń Alǵys hatyn tabys etti jáne mektep ákimshiligine oqýshylardy adaldyqqa tárbıelegenderi úshin alǵys aıtty. Erdáýlet TURAPBEKULY  Ońtústik Qazaqstan oblysy, Saıram aýdany