Gennadıı Golovkınniń aldaǵy kezdesýine boljam jasalyp jatyr

ASTANA. 20 sáýir. Osy kúnderi boksshylar Gennadıı Golovkın men Domınık Ýeıdtiń kezdesýine boljam jasalyp jatyr. Bul týraly egemen.kz tilshisi habarlady. Elimizdiń jáne sheteldiń boks mamandary Golovkın men Ýeıdtiń arasynda ótetin jekpe-jekte otandasymyzdyń jeńetin aıtýda. Solardyń biri bokstan Olımpııa oıyndarynyń qola júldegeri Serik Eleýov óziniń dosy Golovkınniń jeńetinine senimdi ekenin aıtty. «Men Gennadıımen sóılestim. Ol jekpe-jekke daıynmyn dedi. Oǵan Ýeıdpen kezdesýi týraly artyq suraq qoıǵan joqpyn. Menińshe, Gennadıı 5 raýndqa deıin máseleni sheshedi. Kezdesý 5 raýndqa deıin aıaqtalýy múmkin. Golovkınniń soqqylaryna 12 raýnd shydaı alatyn boksshyny áli kórgen emespin. Ýeıdti asa myqty boksshy dep aıta almaımyn», dedi ol. Sonymen birge Serik Eleýov «Qazaqstan» ulttyq telearnasynan aldaǵy kezdesýge sarapshy bolýǵa shaqyrtý alǵanyn, oǵan qýana keliskenin aıtty. Taǵy bir aıtatyn nárse,  "Qazaqstan" RTRK  kórermender arasynda Golovkın men Ýeıdtiń arasynda ótetin jekpe-jekke arnalǵan baıqaý jarııalaǵan bolatyn. Onyń sharty boıynsha qatysýshylar jekpe-jektiń nátıjesin, ıaǵnı kimniń, qalaı jáne qashan jeńiske jetetinin boljam retinde durys aıtýy kerek. "Qazir kórermender men jankúıerler belsendi qatysyp, óz jaýaptaryn jiberip jatyr. Osy ýaqytqa deıin redaksııaǵa barlyǵy 1329 boljam kelip tústi", dep habarlady RTRK-nyń baspasóz qyzmeti. Baıqaý Golovkın-Ýeıd jekpe-jegi bastalǵanǵa deıin jalǵasady. Jaýaptardy myna http://vote.kaztrk.kz/boxing silteme arqyly ótip, berýlerińizge bolady. Jeńimpaz sol kúni anyqtalady. Baǵaly syılyqty kezdesý nátıjesin naqty anyqtaǵan kórermen ıelenedi. Bul jekpe-jekti «Qazaqstan» telearnasy 24 sáýir kúni Astana ýaqytymen saǵat 07.20-tan bastap tikeleı efırde kórsetedi. Sondaı-aq, kezdesý kaztrk.kz saıtynda tikeleı efırde kórsetiledi. Kezdesý 23 sáýir kúni AQSh-tyń Los-Andjeles qalasyndaǵy «Forým» arenasynda ótedi. Dastan Kenjalın. Derek: «Qazaqstan» RTRK baspasóz qyzmeti. Foto: egemen.kz