Ońtústik Qazaqstanda 56 jastaǵy áıel men 7 jasar qyz joǵalyp ketti

ASTANA. 20 sáýir. Ońtústik Qazaqstan oblysy, Túlkibas aýdany, Dáýbaba aýylynda 56 jastaǵy áıel men 7 jasar qyz joǵalyp ketti. Bul týraly 24.kz-ke silteme jasaǵan egemen.kz tilshisi habarlady. Oqıǵa Dáýbaba aýylynda bolǵan. Týystaryna qydyryp barǵan Áshirkúl Baımuratova kishkentaı Inabat esimdi sińilisin ertip, taýǵa qaraı keshtetip serýendep kelýge shyǵyp ketken. Sodan qaıta oralmaǵan. «Sol kúni jaýyn jaýyp tur edi», – deıdi 7 jastaǵy qyzdyń naǵashy ájesi Gúljan Tuıaqova. Onyń aıtýynsha, Áshirkúl bóle cińilisiniń úıine jıi qydyryp kelip turǵan. Taýǵa shyqqandy jaqsy kóredi eken. Buǵan deıin ony Dáýbaba shatqalyna jol biletin eresek azamattar alyp baryp júrgen. Sol kúni eshkimniń qoly bos bolmaǵan soń keshki 18.00 shamasynda «jaqyn jerge baryp kelemi» dep 1-synypta oqıtyn Inabatty ertip ketken. Sondaı-aq, onyń týystary: «Ymyrt ıirilgenshe kúttik, biraq sodan qaıta kelmedi», – deıdi. Ázirge olardy kórgen adam joq. Sol kúnnen bastap izdeý jumystaryna qutqarýshylar men polıseıler jáne erikti aýyl azamattary da jumyldyrylǵan. Tipti ıis sezgish ıt pen arnaıy tehnıkalar paıdalanylýda. Talǵat Raıymbek. Derek, foto: 24.kz.