Elbasy qoǵam qaıratkeri Saǵıdolla Qubashevtiń týystaryna kóńil aıtty

ASTANA. 20 sáýir. Qazaqstan Prezıdenti Nursultan Nazarbaev memleket jáne qoǵam qaıratkeri Saǵıdolla Qubashevtiń qaıtys bolýyna baılanysty týǵan-týystary men jaqyndaryna kóńil aıtý jedelhatyn joldady. Bul týraly akorda.kz-ke silteme jasaǵan egemen.kz tilshisi habarlady. Elbasy qaıǵyǵa ortaqtasyp, kóńil aıtty. Nursultan Nazarbaev Saǵıdolla Qubashevtiń uzaq jyl túrli memlekettik organdarda qyzmet istep, elimizdiń áleýmettik-ekonomıkalyq damýyna aıryqsha úles qosqanyna toqtalyp ótti. Atap aıtqanda, ol birneshe oblystyq atqarý komıtetteriniń tóraǵasy, Gýrev jáne Semeı oblystyq partııa komıtetteriniń birinshi hatshysy, Mınıstrler keńesi tóraǵasynyń orynbasary, Qazaqstan Kompartııasy ortalyq komıtetiniń ekinshi hatshysy qyzmetterin atqaryp, basqarý jumystarynda shyńdaldy. «Ol Qazaqstannyń ósip-órkendeýine, jas býyndy tárbıeleýge kóp eńbek sińirdi. Saǵıdolla Qubashevtiń jemisti qyzmeti joǵary marapattarmen atap ótildi», – delingen jedelhatta. Nursultan Nazarbaev Saǵıdolla Qubashevtiń jarqyn beınesi árdaıym qazaqstandyqtardyń júreginde saqtalatynyn aıtty. Talǵat Raıymbek. Derek, foto: akorda.kz.