Elbasy medıa forýmnyń jumysyna tabys tiledi

ASTANA. 21 sáýir. Búgin Astanada XIII Eýrazııalyq medıa forýmyn Premer-Mınıstrdiń orynbasary, osy basqosýdy uıymdastyrý komıtetiniń tóraıymy Darıǵa Nazarbaeva ashyp, Memleket basshysy Nursultan Nazarbaevtyń quttyqtaý hatyn oqyp berdi. Bul týraly egemen.kz tilshisi habarlady. Darıǵa Nazarbaeva hatta Elbasynyń forýmnyń jumysyna sáttilik tileıtinin, Astanaǵa jer-júziniń ár túkpirinen jınalǵan jýrnalıster men saıasatkerlerdiń pikiri álemdik aqparat keńistigine qomaqty úles qosyp kele jatqanyn atap ótkenin aıtty. «Jańa álemniń, bárimizdiń ortaq bolashaǵymyzdyń qandaı bolatyny árqaısymyzǵa baılanysty. Men «Álem. HHI ǵasyr» atty manıfesimdi usyndym. Onyń maqsaty – jer betinde soǵysty túp-tamyrymen joıý. Bul ǵasyr ortaq erik-jiger arqyly parasat pen jahandyq syndarly dıalog saltanat quratyn damý joly bolýy tıis. Sol sebepti Eýrazııalyq medıa forým alańynda qordalanǵan álemdik problemalardy ashyq talqylap, teńgerimdi sheshimder izdestirý kerek. Forým jumysynyń nátıjesi sizderdiń ıdeıalaryńyz ben bastamalaryńyzdyń jemisi bolmaq. Forým qatysýshylaryna sáttilik tileımin», delingen dedi hatta Darıǵa Nazarbaeva. Sonymen birge ol forýmnyń máni men mańyzyn aıta kelip, onyń adamzattyń problemalaryn talqylaýǵa, sheshýge arnalǵan ashyq alańǵa aınalǵanyn atap ótti. «Eýrazııalyq medıa forým 13 ret ótkizilip keledi. Bul ońy men solyn tanyp, eresek ómirge aıaq basqan bozbalanyń bir ómirlik jasy. Osy ýaqytta forýmda kóptegen máseleler talqylandy, qaraldy. Bıylǵy basqosýda da biz álemniń ár jerinde tóbe kórsetip jatqan problemalardy sheshýdiń jolyn izdeımiz, qarastyramyz. Forýmnyń Astanada ótip jatqanynda da bir mán bar. Qazirgi kezde astanamyz elimizdiń halyqaralyq sahnadaǵy sımvolyna aınalyp otyr. Astana – elimizdiń jańarýynyń aınasy. Osy aınadan aına-qatesiz elimizdiń sáýleti men dáýletiriń jyl ótken saıyn damyp kele jatqanyn kórýge bolady. Astana –bizdiń maqtanyshymyz, bizdiń mahabbatymyz, Qazaqstannyń damý deńgeıiniń bir kórinisi. Búginde qalamyz EXPO-2017 kórmesine daıyndalyp jatyr. Osy úlken sharanyń laıyqty ótýine bárimiz atsalysyp kelemiz», dedi ol. Osydan keıin Darıǵa Nazarbaeva Aýǵanstannyń burynǵy prezıdenti Hamıd Karzaıǵa forýmǵa qatysýǵa kelgenine rahmetin aıtyp, basqa da sheteldikterdiń qonaqjaı qazaq jerine taban tiregenderine rızashylyǵyn bildirdi. «Biz sizderdiń Astanaǵa kelgenderińizge qýanyshtymyz. Forýmda kóptegen máselelerdiń talqylanatynyn bilesizder. Bizdiń bárimizdiń oıymyz birdeı emes, basqosý kezinde qarama-qaıshy kózqarastar, pikirler de bolady. Onyń bári zańdy nárse. Sol sebepti biz bir-birimizdi tyńdap, oılarymyzǵa oı qosyp kelemiz. Endeshe, forýmnyń jumysy ashyq dep jarııalaımyn», dedi  Darıǵa Nazarbaeva. Dastan Kenjalın. Derek, foto: egemen.kz