Taksı «alyp ketken» sábı

Sóıtip, polısııa aǵa serjanttary Qaırat Túkenov jáne Ersin Qaıyrgeldınovtyń qyraǵylyq pen qyzmettik mindetterin adal atqarýlarynyń nátıjesinde «uıqyshyl» sábı de tabyldy-aý... Oblystyq ishki ister basqarmasynyń habaryna qaraǵanda, shynynda da bul – polıseıler úshin tańǵalarlyq oqıǵa bolypty. О́tken aptanyń bir kúni keshki 18.40 shamasynda polısııanyń «102» habarlaý tiregine bir jastaǵy sábıiniń qara tústi shetel kóliginde ketip qalǵany týraly áıel adamnan jedel habarlama túsedi. Qurbysyna qonaqqa kelgen jas ana endi úıine qaıtpaq bolyp, kóshe boıynan taksı toqtatady. Aldyn-ala jol aqysyn tólep qoıady. Úıiniń janyna jetkende birinshi ózi túsip, taksıdi aınalyp, ekinshi esikti ashyp, balasyn almaq bolǵansha, asyǵyp turǵan taksı zý etip júrip ketedi. Qapelimde bulaı bolady dep oılamaǵan áıel tipti, eshteńe de ańǵarmaı qalady. Dereý polısııaǵa habarlap taksıdiń sheteldik jáne qara tústi ekenin aıtady. Sábıdi «alyp ketken» taksıdi izdeýge barlyq izdestirý sharalary jedel qabyldandy. Qaladaǵy búkil taksoparkter aıaǵy­nan tik turdy dese bolady. Polısııanyń barlyq kúshteri balany izdeýge kiristi. Sóıtse, máshıneniń artqy oryndyǵynda sábıdiń qalǵanynan beıhabar taksıst jolaýshy tasymalyn ári qaraı jalǵas­tyrady. Osylaısha ol sábımen shamamen bir saǵattaı ýaqyt qala kóshelerin sharlaıdy. Al, kishkentaı «batyr» bolsa pys-pys etip jum­saq salonda uıqyny soǵyp jata bergen kó­rinedi. Bir qyzyǵy, sábıdiń anasynan keıin taksıge otyrǵandar «balany oıatyp almaıyq» degendeı aldyńǵy orynǵa kelip jaı­ǵa­sypty. Sodan: «Uı­yqtap jatqan myna bala kim?» – dep polısııa qyz­metkerleri kelgen kezde, ańǵal taksıst: «Qaıdaǵy bala?» – dep ań-tań bolypty. Tár­tip saqshy­la­rynyń arqasynda qaıǵyly oqı­ǵa­nyń joly kesildi... Iá, ańǵal taksıst qaqaǵan sary aıazda taksıin túngi garajǵa qaldyrsa, ne bolar edi?.. Farıda BYQAI. Pavlodar.