Yntymaqtastyq órisi keńeıýde

Keshe Syrtqy ister mınıstri Erlan Ydyrysov Ispanııa syrtqy saıasat vedomstvosynyń basshysy Hose Manýel Garsııa-Margalomen kezdesti. Kezdesýde ekijaqty saýda-ekonomıkalyq jáne ınvestısııalyq yntymaqtastyqty nyǵaıtý máseleleri sóz boldy. Kezdesýden keıin mınıstrler baspasóz máslıhatyn ót­kizip, BAQ ókilderine eki memleket arasyndaǵy ózara yntymaqtastyqtyń joǵary deńgeıde damyp kele jatqanyn aıtyp berdi. «Ispanııa Qazaqstannyń saýda-ekonomıkalyq jáne ın­vestısııalyq saladaǵy iri seriktesi bolyp tabylady. Daǵdarysqa deıingi jyldarda atalǵan memleketpen saýda-sattyǵymyz 3 mlrd. dollarǵa deıin jetti. Bul – aýyz toltyryp aıtarlyqtaı kórset­kish. Aldaǵy ýaqytta da dostyq jáne iskerlik qarym-qatynasty odan ári damytýǵa múmkindik mol. Búgingi kezdesýimizdi so­nyń bir satysy desek, artyq aıtqandyq emes. Sondaı-aq, Ispanııa Qazaqstannyń BUU Qaýipsizdik Keńesiniń turaqty emes músheligine ótý umtylysyn qoldaıtynyn erekshe atap ótken jón», – dedi E.Ydyrysov. Sonymen qatar, mınıstr Qazaqstan Prezıdenti Nursultan Nazarbaevtyń Ispanııa koroli IV Fılıppti EKSPO-2017 ha­lyqaralyq kórmesi aıasynda elimizge resmı sapar jasaýǵa shaqyrýy týraly sóz etip: «Biz Memleket basshysynyń atynan Ispanııa koroline jiberilgen shaqyrýyn naqtyladyq. Atalǵan sapar 2017 jyly Astanada ótetin EKSPO kórmesi kezinde júzege asady degen úmittemiz», – dedi. Odan bólek, vedomstvo basshysy Ispanııanyń kólik logıs­tıkasy, aýyl sharýashylyǵy, mashına jasaý, qaıta óńdeý, ınnovasııa, jasyl tehnologııa jáne telekommýnıkasııa salalarynda mol tájirıbesi bar ekenin aıtyp, Qazaqstannyń osy baǵyttar boıynsha yntymaqtastyqty nyǵaıtýǵa múddeli ekenin jet­kizdi. E.Ydyrysovtyń aıtýynsha, Ispanııa Syrtqy ister mınıstriniń resmı sapary aıasynda ótken Qazaqstan-Ispanııa bıznes-forýmynda atalǵan baǵyttarǵa basymdyq berilmek. Sondaı-aq, kezdesýde eki­jaqty qujatqa qol qoıylyp, «Jasyl kópir» seriktestik baǵdarlamasy bekitildi. Atalǵan qujatqa H.Garsııa-Margalomen qatar, Qazaqstan tarapynan Energetıka mınıstri Qanat Bozym­baev qol qoıdy. О́z kezeginde, H.Garsııa-Margalo bul baǵdarlamanyń mańyzdylyǵyna toqtaldy. «Biz búgin eki taraptyń baı­la­nysyna jańasha serpin beretin qujatqa qol qoıdyq. Bul tyń bastamaǵa Qazaqstan ja­ǵynyń muryndyq bolǵanyn atap ótkim keledi. Sizder úshin ınfraqurylym, qýat kózi, sý resýrstary jáne týrızm salalarynda ıspanııalyq kásiporyndar úlken rólge ıe. Al bizder úshin Qazaqstan Ortalyq Azııadaǵy eń jaqyn seriktesimiz», – degen H.Garsııa-Margalo ıspanııalyq kásipkerlerdiń 17 mln. tutyný­shysy bar Qazaqstanda óz isterin júrgizýge qyzyǵýshylyq tanytyp otyrǵanyna nazar aýdardy. Aıta keteıik, atalǵan bız­nes-forýmǵa Ispanııa tarapy­nan 20-dan astam kompanııa qatyssa, qazaqstandyq bıznes-delegasııanyń quramynda 90 kompanııa boldy. Olar avıasııa, áskerı tehnıka, munaı-gaz, tehnologııalar transferti jáne memlekettik-jekemenshik áriptestik, sondaı-aq, taǵy basqa salalar boıynsha yntymaqtasý máselelerin qarastyrdy. Elaman QOŃYR, «Egemen Qazaqstan»