ASTANA. 29 sáýir. Qazaqstan Prezıdenti Nursultan Nazarbaev «Qaısar-2016» terrorǵa qarsy keshendi oqý-jattyǵýyn kórdi. Bul týraly akorda.kz-ke silteme jasaǵan egemen.kz tilshisi habarlady.
Qazaqstan Prezıdenti – Qarýly kúshterdiń joǵarǵy Bas qolbasshysy Ishki ister mınıstrliginiń arnaýly maqsattaǵy bólimsheleriniń jaýyngerlik jáne ádistemelik daıarlaý ortalyǵynyń negizgi nysandaryn qarap kórdi, sondaı-aq, memlekettik kúzet qyzmetiniń «Qalqan», Ulttyq ulannyń «Búrkit», Ishki ister mınıstrliginiń «Suńqar», Ulttyq qaýipsizdik komıtetiniń «Arystan», Almaty qalasy ishki ister departamenti men Qorǵanys mınıstrliginiń bas barlaý basqarmasynyń «Arlan» arnaýly maqsattaǵy bólimsheleriniń kúshteri men quraldaryn qatystyrǵan oqý-jattyǵý barysyn baqylady.
Jattyǵý barysynda antıterrorlyq baǵyttaǵy is-sharalar ótkizý kezindegi arnaýly maqsattaǵy bólimshelerdiń is-qımyly pysyqtaldy.
«Qaısar-2016» jattyǵýyna qatysýshylarǵa sóz arnaǵan Memleket basshysy jańa jaýyngerlik jáne ádistemelik daıarlyq ortalyǵynyń sarbazdar sheberligin shyńdaýǵa múmkindik bere otyryp, olardy sapaly oqytýdy qamtamasyz etetinin atap ótti.
«Oqý-jattyǵýǵa ushqyshtar men desanttar, artıllerıster men barlaýshylar, arnaýly jasaq jaýyngerleri qatysty. Barlyǵy da sheberlik pen batyldyq tanytyp, daıyndyq deńgeıi joǵary ekenin kórsetti», – dedi Nursultan Nazarbaev.
Qazaqstan Prezıdenti sońǵy kezde álemde jáne óńirde bolyp jatqan oqıǵalar, jer júziniń ár tarapyndaǵy terrorlyq aktiler, Taıaý Shyǵystaǵy áskerı qımyldar yqtımal qaterge daıyn bolý kerektigin kórsetip otyrǵanyna nazar aýdardy.
«Qarýly kúshterdiń otanymyzdy jáne memleketimizdiń egemendigin qorǵaý, aýmaqtyq tutastyǵyn saqtaý jolyndaǵy mańyzy zor», – dedi Memleket basshysy.
Nursultan Nazarbaev Qazaqstan armııasy, ózge áskerı qurylymdar, arnaýly organdar Táýelsizdik jyldary óz damýynyń jańa kezeńine ótkenin aıtty.
«Qazaqstan táýelsizdiginiń 25 jyldyǵyna daıyndala otyryp, biz zamanaýı Qarýly kúshterdi qalyptastyrdyq dep aıta alamyz. Olar qazirgi zamanǵy qarý-jaraqpen jáne tehnıkamen jabdyqtalyp, kásibı kadrlarmen jasaqtalyp, laıyqty deńgeıde oqytylady. Qyzmettiń áleýmettik jaǵy aıtarlyqtaı jaqsartyldy. Osy máseleniń bárine men joǵarǵy Bas qolbasshy retinde udaıy kóńil bólip otyrmyn», – dedi Qazaqstan Prezıdenti.
Memleket basshysy áskerı qyzmetshilerdiń mindeti elimizdegi tynyshtyqty, tatýlyq pen kelisimdi saqtaý ekenin atap ótti.
«Sizder – dańqty aǵa urpaqtyń erlik dástúrleriniń muragerisizder. Otanymyz sizderge memleket múddesin jiti qorǵaý, ulttyq qaýipsizdik pen Qazaqstan Respýblıkasynyń ishki turaqtylyǵynyń senimdi kepili bolý sııaqty aıryqsha mańyzdy isti senip tapsyrdy. Bul sizderden joǵary mashyqty ǵana emes, qaısarlyqty, shynaıy patrıotızmdi de talap etedi», – dedi Nursultan Nazarbaev.
Qazaqstan Prezıdenti jaýyngerlik tý áskerı bólimniń negizgi áskerı belgisi bolyp sanalatynyna nazar aýdardy.
«Ol áskerı qyzmetshiniń adaldyǵyn, erligi men batyldyǵyn beıneleıdi. Bizdiń babalarymyz jaýyngerlik týmen shabýylǵa shyǵyp, jeńiske jetti, otanymyzdy qorǵady. Búgin men jekelegen áskerı bólimderge bizdiń aıbynymyz ben dańqymyzdyń rámizine aınalatyn jaýyngerlik tý tapsyramyn. Otanymyzdyń qaýipsizdigin qamtamasyz etý isine úles qosa otyryp, bul baıraqty asqaqtata ustaǵan jón», – dedi Memleket basshysy.
Sonymen qatar, joǵarǵy Bas qolbasshy barlyq áskerı qyzmetshilerdi aldaǵy otan qorǵaýshy kúnimen quttyqtap, otan ıgiligi jolyndaǵy jaýyngerlik qyzmetterine sáttilik, elimizge tynyshtyq tiledi.
Keshendi oqý-jattyǵý aıaqtalǵannan keıin Nursultan Nazarbaev eldiń kúshtik qurylymdarynyń arnaýly bólimsheleriniń jeke quramy aldynda Ulttyq ulannyń 5572-shi áskerı bóliminiń jáne Qorǵanys mınıstrliginiń bas barlaý basqarmasynyń 22750-shi áskerı bóliminiń komandırine óz qolymen jaýyngerlik tý tapsyrdy. Sondaı-aq, Qazaqstan Prezıdenti qyzmette aıryqsha kózge túsken birqatar áskerı qyzmetshilerge jańa páterdiń kiltin tapsyrdy.
Ishki ister mınıstrliginiń arnaýly maqsattaǵy bólimsheleriniń jaýyngerlik jáne ádistemelik daıarlaý ortalyǵy Almaty oblysynyń Ile aýdanynda ornalasqan. Ol jalpy aýdany 208 gektar jerdi alyp jatyr. Ortalyq qurylysy 2014 jyly sáýirde bastaldy. Qazirgi kezde kestege sáıkes júrip jatqan qurylys jumystaryn 2016 jyldyń qarasha aıynda aıaqtaý josparlanǵan. Áleýmettik jáne sharýashylyq orynjaılaryn qosa eseptegende barlyǵy 60-tan asa nysan paıdalanýǵa beriledi.
Ortalyq aýmaǵynda túrli mýltımedııalyq atys tırleri, snaıpermen oq atýǵa úıretetin Robotech kesheni, shabýyl jasalatyn nysanǵa jaqyndaý is-qımylyna mashyqtandyrýǵa arnalǵan 4 qabatty turǵyn úı maketi, jaýyngerlik atys nysany ornalasqan.
Sonymen qatar, áskerı qalashyqta shtab, jaıly kazarma, mádenı demalys sharalaryn ótkizýge arnalǵan klýb, jataqhana, 2 qabatty sport kesheni, avtokólik parki, kınologııalyq qalashyq bar.
Jalpy, Ishki ister mınıstrliginiń arnaýly bólimshesi ortalyǵynyń ınfraqurylymy arnaýly maqsattaǵy bólimshelerdi tıisti deńgeıde oqytyp, jaýyngerlik sheberlikterin shyńdaýǵa múmkindik beredi.
Talǵat Raıymbek.
Derek, foto: akorda.kz.
