Radıo – kóńil kúı barometri

Keshe Astanadaǵy Ulttyq akademııalyq kitaphanada Qazaq radıosynyń 95 jyldyǵy men «Shalqar» radıosynyń 50 jyldyǵyna arnalǵan saltanatty shara ótti. Sharaǵa qoǵam qaıratkerleri, zııaly qaýym ókilderi, aqyn-jazýshylar, radıo ardagerleri qatysyp, beınetaspa arqyly radıo tarıhynyń ótkeni men búginin oı eleginen ótkizdi. Basqosýda Qazaq radıosy men «Shalqar» radıosynyń qoǵamdaǵy orny, mádenıet pen ónerdi damytýdaǵy róli týra­ly tushymdy sóz qozǵaldy. Sodan soń Qazaq radıosynyń dırektory Mahat Sadyq, Ulttyq akademııalyq kitaphananyń bas dırektory Úmithan Muńalbaeva, senator Ádil Ahmetov, Parlament depýtaty Aldan Smaıyl, zııaly qaýym ókilderi Sultan Orazalın, Ǵadilbek Shalahmetov, Nesip­bek Aıt­uly, t.b. qaıratker­ler men radıo ardagerleri atalǵan mereıtoılarǵa baılanysty óz pikirleri men jyly lebizderin bildirdi. Shara barysynda Qa­zaq radıosy men «Shalqar» radıo­synyń ónerpaz qyz-jigitteri óz ónerlerin ortaǵa saldy. Sondaı-aq, shara aıasynda «Qazaqtyń úni – qazaq radıosy» atty taqyrypta kitap-ıllıýs­trasııa kórmesi ótti. Aıta keteıik, Qazaqstannyń eńbek sińirgen qaıratkeri, professor Namazaly Omashevtiń «Qa­zaq radıosyna qansha jyl?» atty zertteý maqalasynda: «Qa­­zaq AKSR Halyq komıssar­lar keńesiniń 1921 jylǵy 29 qyrkúıektegi sheshiminiń res­pýblıkalyq radıonyń dúnıege kelýine tikeleı áse­ri boldy. Onda qazan aıynan bas­tap Orynbordaǵy radıo­stansııa arqyly kún saıyn 1600 sózden turatyn ózderi da­ıyndaǵan radıobıýlletendi res­pýblıkaǵa taratýǵa quqyq beriledi. Endeshe, 1921 jyldyń qazan aıyn respýblıkalyq Qazaq radıosynyń týǵan kúni dep ataýǵa tolyq negiz bar», – dep jazady. Al 1966 jyly 1 qańtarda da­ýylpaz dıktor Ánýarbek Baıjanbaev aqparatty-sazdy «Shalqar» baǵdarlamasynyń dúnıege kelgenin efırden qýana habarlaǵan bolatyn. Raýshan TÁÝIRHANQYZY, «Egemen Qazaqstan»