ASTANA. 1 mamyr. Búgin fýtboldan Qazaqstan premer-lıgasynyń 8-týry oıyndary oınaldy. Ortalyq kezdesý sanalǵan «Astana» – «Qaırat» matchynda elordalyqtar 1:0 esebimen jeńiske jetti. Bul týraly egemen.kz tilshisi habarlady.
«Astana Arena» stadıonynda bolǵan oıynda esep 8-mınýtta ashyldy. Alań ıeleriniń jartylaı qorǵaýshysy Serikjan Mujyqovtyń sol qaptaldan aıyp alańyna asyrǵan dobyna ózgelerden buryn jetken serbııalyq legıoner Nemanıa Maksımovıch basymen nátıjeli soqqy jasady. Bul Maksımovıchtiń osy maýsymdaǵy alǵashqy goly ekenin atap ótken jón.
Goldan qanattanǵan astanalyqtar úziliske deıin esepti eseleıtin birneshe múmkindikke ıe boldy. Sondaı sátterdiń birinde, ıaǵnı 28-mınýtta komanda kapıtany Tańat Nóserbaevtyń tepken doby qaqpa mańdaıshasynan keıin serpildi.
О́z kezeginde «Qaırat» oıynshylary tarazy basyn teńestirý úshin kúsh jumsady. Degenmen, Baýyrjan Islamhan bastaǵan almatylyqtar qarsylastarynyń osal tusyn taba almady.
Ekinshi taımda da osy oıyn órnegi qaıtalanyp, nátıjesinde, «Astana» oıynshylary maýsym barysyndaǵy 7-jeńisterine qol jetkizdi. Al «Qaırat» jańa maýsymda osymen tórtinshi ret jeńiliske ushyrap otyr. Osy rette bul matchqa «Qaırattyń» byltyrǵy maýsymdaǵy surmergeni Jerar Goýdyń qatyspaǵanyn aıta keteıik.
Týr barysynda taǵy 3 oıynda 1:0 esebi tirkeldi. Atap aıtqanda, Shymkentte jergilikti «Ordabasy» Oraldyń «Aqjaıyǵyn» osyndaı eseppen tize búktirse, óz alańynda «Tarazdy» qabyldaǵan Qostanaıdyń «Tobyly» fransııalyq legıoner Allassane Ndıaıeniń kómegimen sońǵy mınýttarda jeńis golyn soǵyp ketti. Odan bólek, «Aqtóbe» óz alańynda Kókshetaýdyń «Oqjetpesinen» 1:0 esebimen basym tústi.
Týrdaǵy eń iri esep Taldyqorǵanda ótken jergilikti «Jetisý» men Pavlodardyń «Ertisi» arasyndaǵy kezdesýde tirkeldi. Bul oıynda alań ıeleriniń qaqpasyna jaýapsyz úsh gol soqqan pavlodarlyqtar maýsymdaǵy 6-jeńisterine qol jetkizip, týrnır kestesindegi 2-oryndaryn saqtap qaldy.
Al Qaraǵandynyń «Shahteri» men «Atyraý» arasyndaǵy kezdesýde esep ashylǵan joq.
8-týr oıyndarynyń nátıjeleri:
«Astana» (Astana) – «Qaırat» (Almaty) 1:0
Gol: Nemanıa Maksımovıch 8.
«Ordabasy» (Shymkent) – «Aqjaıyq» (Oral) 1:0
Gol: Dáýrenbek Tájimbetov 72.
«Tobyl» (Qostanaı) – «Taraz» (Taraz) 1:0
Gol: Alassane Ndıaıe 90+4.
«Jetisý» (Taldyqorǵan) – «Ertis» (Pavlodar) 0:3
Goldar: Roman Murtazaev 40, 41, Ignasıo Fernandes 90+4.
«Shahter» (Qaraǵandy) – «Atyraý» (Atyraý) 0:0
«Aqtóbe» (Aqtóbe) – «Oqjetpes» (Kókshetaý) 1:0
Gol: Samat Smaqov 72 (penaltı).
8-týr oıyndarynyń qorytyndysy boıynsha týrnır kestesi
- Roman Murtazaev («Ertis») – 5 gol;
- Gogıta Gogýa («Ertis») – 3 gol;
- Azat Nurǵalıev («Ordabasy») – 3 gol.
