Qarǵaly ózeni taǵy da tasydy

О́tken jylǵy maýsymda laı aralasqan selden soń Almaty turǵyndary arnasy shaǵyn, eleýsiz syldyrap aǵatyn Qarǵaly ózenine nazary aýǵan edi. Neshe kún tolassyz jaýǵan aq jaýyn sol Qarǵalynyń atyn taǵy da shyǵardy. Taýdan aqqan jaýyn sýy bul joly byltyr qatty zardap shekken Naýryzbaı aýdanynan sarqyraı aǵyp ótip, etektegi Alataý aýdanynyń birqatar kóshelerin sýǵa toltyrdy. Barlyǵy 15 úıdiń ishine sý kirip, turǵyndardy ábigerge saldy. Sý basqan aýmaqtyń zardabyn joıýǵa Almaty qalasynyń tótenshe jaǵdaılar departamenti jedel kiristi. Birinshi kúnnen bas­tap órt sóndirý jáne apattyq-qutqarý jumystary qyzmetinen – 40 adam, azamattyq qorǵanystyń sýmen qamtý qyzmetinen – 46 adam, azamattyq qorǵanystyń ınjenerlik qyzmetinen – 26 adam, jylýmen qamtý qyzmetiniń 50 ókili, joldar men kópirler qyzmetinen – 120 adam, 20 tehnıka, Almaty ákimdigi janyndaǵy qutqarý qyzmetinen (109) barlyǵy – 30 adam, 8 tehnıka, Qurlyq áskerleriniń áskerı ınstıtýtynan 161 adam, 5 tehnıka iske jappaı jumyldyryldy. Zardap shekken aýmaqta budan tys barlyǵy 342 adam men 13 tehnıka birligi jumys istedi. Qazir jaǵdaı turaqtalǵan sekildi. Kósheler balshyq pen qoqystan tazartyldy. Tek bir ǵana Qarǵaly ózeniniń jaǵasyna barlyǵy 45 tonna qum aralas topyraq tógilip, qum salynǵan 2000-daı qapshyqtar qoıyldy. Kishi Almaty, Esentaı, Úlken Almaty ózenderi de anda-sanda arnasynan asyp aǵyp qoıady. Jańbyr Almatyda, ásirese, túni boıy jaýady. Sınoptıkter Almaty qalasy men Almaty oblysynda aq jaýyn áli birneshe kún úzdik-sozdyq sir­kirep jaýady degen málimet berip otyr. Tótenshe jaǵdaılar depar­ta­menti mobıldi telefondar jeli­si arqyly taýly aımaqtarda sel qaý­pi baryn qaıta-qaıta eskertýde. Talǵat SÚIINBAI, «Egemen Qazaqstan» ALMATY