Janarym – meniń júregim

Múmkindigi shekteýli, ıaǵ­nı zaǵıp qamkóńil jas­tar­dyń ıntellektýaldyq, shyǵar­mashylyq qabiletterin eskerip, aqparattyq keńistikte nasıhattap, júrekterine shyraq, kó­ńilderine shýaq syılaý – bizdiń kitaphananyń basty mindeti. Olarǵa qoǵamda teń ekendikterin sezinip júrýlerine qamqorlyq jasap, qoldaý kórsetip, ómirde óz ornyn taýyp, bıik belesterge jetken zaǵıp azamattardyń ómirin arqaý etý arqyly kóp­tegen áleýmettik-saýyqtyrý ju­mystary júrgizilýde. Oblysta 5 myńnan asa I-II toptaǵy kózi kem múgedekter tu­rady. Bul kisilerdiń ishinde kóptegen zaǵıp jandar joǵary bilimdi, bireýleri óleń jazyp, án aıtsa, al bireýleri kezinde birneshe sport túrlerinen chempıon atanǵan jandar. Jáne áli kúnge sporttan qol úzgen emes. Túrli oqıǵa saldarynan kóz janarynan aıyrylǵan azamattar úlken kúızeliske ushyrap, tipti, ómirimen qoshtasqysy kelip óz-ózine qol jumsap jat­qan jaǵdaılar da joq emes. Sondyqtan, zaǵıp jan­dardyń rýhyn kóterý maqsatynda kitaphana kóptegen jumystar atqaryp keledi. Jaqynda kitaphanada Táý­el­­sizdiktiń 25 jyldyǵyna ar­nalǵan kesh uıymdastyrylyp, kelýshiler kóz múgedekteriniń ıntellektýaldy qabiletterine, sport oıyn­daryna, qolóner sheberligine, aqyndyq, ánshilik, kúı tartý sııaqty jan-jaqty talanttaryna kýá boldy. Zaǵıp jastar ózde­riniń patrıottyq sezimderin ónerleri arqyly jetkizdi. Keshti oblystyq kóz múgedekteri balalaryna arnalǵan «Úmit» mektep-ınternaty oqýshylarynan quralǵan «Suńqar» dombyrashylar orkestri «Kúı tartys», «Tepeńkók» kúılerimen ashty. Kóz múgedegi, jas aqyn, «Jas ja­nym qushtar aq tańǵa» óleń jınaǵynyń avtory Erbek Bakıev, T.Ábdirásilov, P.Úısinbaeva, N.Oral­baı, R.Taıyrov, N.Tó­rebaı, M.Eralıeva, A.Smandııar, «Samǵaý» toby, Asylaı men Nurtileý, Q.Basqan, J.Barlybaev óleń oqyp, án shyrqady, dombyrada oınady. Sondaı-aq, bul keshte shetelderde ótken par­alımpıadanyń birneshe dúrkin jeńimpazy (júzýden) M. Ibrashev óz jeńisti sátterimen bólisken bolsa, sportshy jastar arasynda shahmat, doıby, toǵyzqumalaqtan jarystar uıymdastyryldy.  Ulbıke TURANBAEVA, oblystyq zaǵıptar kitaphanasy dırektorynyń orynbasary Ońtústik Qazaqstan oblysy