Astanada urlyq jasaǵan kúdikti aýylda ustaldy

QOSTANAI. 11 mamyr. Qostanaı oblysynyń Denısov aýdanynan izdeýde júrgen qylmysker ustaldy. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady. Denısov aýdanyndaǵy jergilikti polısııa qyzmetkerleri, ýchaskelik ınspektorlar Dáýren Ysqaqov pen Baǵdat Keneshev shyǵyny ondaǵan mıllıon teńge turatyn asa iri kólemde urlyq jasaǵan kúdiktini ustady. Eki ınspektor qashqan ony qýyp ustap alý úshin egindik alqappen 3 shaqyrymdaı júgirip otyrdy. Inspektor Dáýren Ysqaqov: «Merekede aýdandaǵy eldi mekenderdegi tártipti kúsheıtkenbiz. Biz áriptesim ekeýmiz Taran men Denısov aýdandarynyń shekarasynda ornalasqan Pereleskı aýylynda tártipti qadaǵaladyq. Biz poselkege kirip kele jatqanda aldymyzdan qarsy shyqqan mashınadan er adamdy baıqap qaldyq. Túri izdeý salynǵan qylmyskerge uqsap ketti. Biz mashınany toqtattyq, oǵan jaqyndaı bergende álgi kisi mashınadan sekirip tústi de qasha jóneldi», – dedi. Kúdikti jergilikti turǵyn, jerdiń oı-shuqyryn jaqsy biledi. Ol poselkeniń shetine deıin bardy da, egin alqabyna túsip qashty. Eki ýchaskelik ınspektor jaıaý artynan qýyp otyrdy, báribir ustaldy. Ustalǵan adam shyndyǵynda Astanada, Denısov aýdanynda iri urlyqtar jasap, qashyp júrgen, Astana qalalyq ishki ister departamenti izdeý salǵan qylmysker bolyp shyqty. Qazir ol qamaqta otyr, sotqa deıingi tergeý amaldary júrip jatyr. Názıra Járimbetova. Derek, foto: Qostanaı oblystyq ishki ister departamentiniń baspasóz qyzmeti.