72 jasynda ana atandy

Úndistannyń Harıana shtatynda budan birneshe apta buryn 72 jastaǵy Daldjınjer Kaýr esimdi áıel alǵash ret ana atandy. Perzenttiń ákesi – Mohınder Sıng Gıllanyń jasy qazir 79-da eken. Bul jaǵdaı sáýirdiń 19-y kúni oryn alǵanymen, aqparat betterinde birer kún buryn ǵana jarııalandy. Otaý tikkeli 46 jyldan beri áıel bala kótere almaı kelgen. Alaıda, jasandy jolmen bala kóterýdiń múmkindigi týraly estigende, «áýlıeden áýlıe qoımaı qydyryp, etegin sheńgel sydyrmasa da», eki bilekterin sybana baryn salyp izdenýge kirisip ketken. Úmit oty qaıta tutanǵan erli-zaıyptylar sońǵy eki jyl boıy qaladaǵy úzdik klınıkalarda úzdiksiz em qabyldap, qolda bar múmkindiktiń bárin jasaǵan. – Shyny kerek, beınebir ózge álemde júrgendeımin. Týǵan balamnyń baryna áli de sene alar emespin. Jaratqan bizdiń kúni-túni jasaǵan duǵamyzdy qabyl aldy. Tuńǵyshym ómirge kelgeli tolyqqandy otbasynda ómir súrip júrgenimdi sezingendeı boldym. Jasym jetpisten assa da boıymdaǵy kúsh-qýatym áli qaıtqan joq, sábıimdi ózim baǵyp-qaǵamyn. Jubaıym da qamqor jan, maǵan barynsha kómek kórsetip júr. Al ulymyzdyń esimin aqyldasa kele Armaan dep qoıýdy jón kór­dik, – deıdi Daldjınjer Kaýr. Eń qyzyǵy, álemdi tańyr­qatqan bul jaǵdaı Úndistanǵa tańsyq emes sııaqty. Osydan 8 jyl buryn, ıaǵnı 2008 jyly Ýttar-Pradesh shtatynda egde tartqan 72 jastaǵy áıel bosanyp, egiz balany dúnıege ákelgen eken. Dárigerlerdiń aıtýynsha, 45 jastan keıin áıelderdiń bala kóterý múmkindigi aıtarlyqtaı tómendeıdi. Al 50 jastan asqan­dardyń deni saý bala týýy ekitalaı bolsa kerek. Degenmen, Qudaıdyń qudiretinde shek joq qoı. Aıan ÁBDÝÁLI, «Egemen Qazaqstan»