Semeıdegi sándi sýburqaq

Jeńis kúni qurmetine ashyldy Semeıdiń ortalyq alańynda mýzykasy oınap turatyn jańa sýburqaq ashyldy. Qala kindigindegi kókke shap­shyǵan móldir sýlarymen, ǵajaıyp sazymen, myń buralǵan bıimen hám kórer kózge kórkem túrli-tústiligimen baýraǵan bul erekshe fontan nysanyna oblystyq bıýdjetten 205 mıllıon teńge jumsaldy. Onyń kókke tik shanshylǵan sýlarynyń bıiktigi 18 metrge deıin jetedi. Qurylysy ótken kúzde bastalyp, 9 mamyr – Jeńis kúninde paıdalanýǵa berildi. Sýburqaq qurylysyn «Semeı­plastkom» kásiporny júrgizgen. Qala qaýymy kóp jınalǵan tusaý­keserde nysannyń turǵyndar kóńilinen shyqqany ańǵaryldy. «Sýburqaqtyń óz dıametri 30 metrdi qurasa, joǵary tostaǵanynyń bıiktigi 8 metrge teń. Sý ishinde 280 dıodty jaryq shamdary ornatylǵan. Al eń bas­ty aǵysy jerden 18 metr bıiktikke deıin shapshıdy. Tórt jaǵynda 4 baǵana ornalasqan. Sý aǵystary tanymal klassıkalyq shyǵarmalarmen birge bes túrli túspen kómkerile kóteriledi. Bul jobada 10 áýen oınaıdy», – delingen qala ákimdigi taratqan habarlamada. Dál osy ispetti án salyp, bı bı­leı­tin ásem fontandar byltyr oblys ortalyǵynda paıdalanýǵa be­rilgen bolatyn. Oblys ákimi Danıal Ahmetovtiń bastamasymen salynǵan bul sýburqaqtar ázirge elimizde kúrdeli akvadızaınǵa ıe erekshe nysandardyń biri bolyp otyr. Jeńis kúninde se­meı­likterge shat-shadyman kóńil kúı syılaǵan nysan tusaýkeseri shahardyń barqyt aspanyndaǵy otshashýlarmen aıaqtaldy. Dýman ANASh, «Egemen Qazaqstan»