QOSTANAI. 12 mamyr. Qostanaı qalasyndaǵy jedel basqarý ortalyǵyna 5 aıdyń ishinde turǵyndardan 60 myńǵa tarta dabyl túsken. Olardyń arasynda 38 myń qylmys ashylyp, 7 myń quqyq buzýshylyq anyqtalǵan. Bul týraly oblystyq ishki ister departamenti baspasóz qyzmetine silteme jasaǵan egemen.kz tilshisi habarlady.
Qostanaı qalasyndaǵy jedel basqarý ortalyǵyn qalalyq ishki ister basqarmasynyń «júregi» dep aıtýǵa bolady. Munda «102» nomeri arqyly tynymsyz dabyl túsip jatady. Polısııanyń jumysy da osy túsken dabyldar izimen qurylady.
Qostanaıdaǵy jedel basqarý ortalyǵy 2005 jyly qurylǵan bolatyn. Ol ishki ister organdarynyń quqyq buzýshylyqpen kúresiniń, tártip ornatýdaǵy jumysynyń tıimdiligin arttyryp, birden nátıjesin kórsetti. Ortalyqta kezekshiler televızııalyq monıtordan 179 kamerany baqylap otyrady. Onyń ishinde 112 kamera qoǵamdyq oryndarǵa qoıylǵan, qalǵandary turǵyn úılerdiń aýlasynda tur.
Qostanaı qalalyq ishki ister basqarmasy jedel basqarý ortalyǵynyń bastyǵy, kapıtan Asylbek Bıkenov: «Jedel basqarý ortalyǵynyń qyzmetkerleri ishki ister basqarmasynyń jumysyn úılestiredi. Ortalyqta barlyǵy da avtomattandyrylǵan. Mysaly, «102» arqyly dabyl túsirgen adamnyń telefony kórinedi, sol sátte daýysy jazylady. Eger zardap shekkender bolsa «jedel járdemmen» tikeleı baılanys qosylady», – dedi.
Názıra Járimbetova.
Derek, foto: Qostanaı oblystyq ishki ister departamenti baspasóz qyzmeti.
