Ońtústikte Májilis depýtattary jýrnalıstermen júzdesti

ShYMKENT. 12 mamyr. Ońtústik Qazaqstan oblystyq aımaqtyq kommýnıkasııalar qyzmetinde Parlament Májilisiniń depýtattary Qudaıbergen Erjan, Ýálıhan Qaınazarov, Mansurhan Mahambetovter Ońtústik óńirine jasaǵan jumys saparynyń qorytyndysy boıynsha baspasóz máslıhatyn ótkizdi. Bul týraly egemen.kz tilshisi habarlady. Júzdesýlerde halyq negizinen jer kodeksindegi ózgerister jáne jalǵa berý máselesinde suraqtardy qoıǵan. Ońtústik Qazaqstan oblysyna «Nur Otan» partııasy fraksııasy men Qazaqstan halqy Assambleıasy atynan saılanǵan 8 Májilis depýtaty kelse, olardyń qatysýymen oblysta 33 kezdesý uıymdastyrylyp, oǵan 6 myńnan astam turǵyn qamtylǵan. «Búginde Parlament Májilisinde jaıylymdyq jerler boıynsha arnaıy zań ázirlenip, osyǵan qatysty usynystar jınaqtalýda. Elimizde jalpy kólemi 188 mln. gektar bolatyn jaıylymdyq jer bolsa, onyń 80 mln. gektary tıimdi ıgerilip otyr. Al 27 mln. gektar jerdiń tozyǵy jetken», dedi Parlament Májilisiniń depýtaty Ýálıhan Qaınazarov. Bárimizge belgili, Elbasy Jer kodeksindegi ózgeristerge baılanysty moratorıı jarııalaǵan. «Halyq qalasa han túıesin soıady» degendeı Memleket Basshysy «halyq qalamaǵan Zań bizge keregi joq» degen. Áıtse de paıdalanylmaýdan qunary tozyp bara jatqan bos jerler halyq paıdasyna jumys jasasyn. Jer-halyqtyń qazynasy. Ony memlekettiń ál-aýqatyn kóterýge paıdalaný kerek. Depýtattar toqtamy osy. Baqtııar Taıjan. Derek, foto: egemen.kz