Qymyzdan balmuzdaq jasaý jobasy álemdik kýbokka joldama aldy

PAVLODAR. 12 mamyr. Buǵan deıin S. Toraıǵyrov atyndaǵy Pavlodar memlekettik ýnıversıteti komandasynyń bul jobasy Enactus Kazakhstan National EXPO 2016 stýdenttik jastardyń áleýmettik jáne bıznes-jobalarynyń respýblıkalyq baıqaýynda jeńimpaz atandy. Bul týraly egemen.kz tilshisi habarlady. Bilim jáne ǵylym mınıstrligi men Prezıdent janyndaǵy jastar saıasaty jónindegi keńestiń qoldaýymen ótken baıqaýǵa elimizdiń joǵary oqý oryndarynan 42 komanda qatysty. Ýnıversıtet komandasy ekonomıkalyq, ekologııalyq, áleýmettik máselelerdi sheshýge baǵyttalǵan is júzinde jumys jasap jatqan 4 joba usyndy. «Qazaqstandy qalaı tamaqtandyrýǵa bolady?» bıznes-jobalar baıqaýynda stýdentter qymyzdan jasalǵan balmuzdaq ıdeıasy úshin 1 mıllıon teńgege ıe boldy. Enactus PSU komandasynyń kapıtany Arnagúl Búrkúttiń aıtýynsha, stýdentter ýnıversıtet qabyrǵasynda alǵan teorııalyq bilimi men kásipkerlik qabiletterin tájirbıede qoldanady. Ol: «Komandanyń árbir múshesi elimizdiń ekonomıkasy men mádenıetiniń damýyna óz úlesterin qosyp keledi. Bizdiń ıdeıalar ǵalamdyq ıdeıa», – deıdi. Ýnıversıet komandasy jeńimpaz retinde bıyl qazan aıynda Toronto qalasynda (Kanada) ótetin Enactus 2016 álemdik kýbogynda elimizdiń atynan qatysady. Farıda Byqaı. Derek, foto: egemen.kz.