Qazaq tili

Omby mektepterinde engizildi Kórshiles jatqan Reseı eliniń Omby oblysyndaǵy mektepterde qazaq tili páni engizildi. Aldymyzdaǵy qyrkúıek aıynan bastap mundaǵy kez kelgen oqýshy qazaq tilinde oqı alady. Ana tilimiz tek mektepterde ǵana emes, sonymen qatar, balabaqshalarda da engizildi. Osyǵan baılanysty arnaıy synyptar ashyldy. Osy oraıda, jaqynda el Táýel­sizdiginiń 25 jyldyǵyna oraı, Sol­tústik Qazaqstan oblysynyń tilderdi damytý jónindegi bas­qarmasy Omby qalasynda F.M.Dostoevskıı atyndaǵy mem­lekettik ýnıversıtetinde «On­laın rejimi arqyly qazaq tilin oqytýdyń tıimdi joldary» degen taqyrypta semınar ót­kizgenin aıta ketkenimiz jón. Jıyn barysynda tilderdi qol­daný men damytýdyń 2011-2020 jyldarǵa arnalǵan memle­kettik baǵdarlamasynyń júzege asyrylý barysy talqylanyp, qazaq tilin oqytýdyń tıimdi joldary keńinen baıandaldy. Sonymen qatar, jańa oqýlyqtar men baǵdarlamalar tanystyrylyp, eki júzden astam oqý quraly tabys etildi. Resmı málimetter boıynsha, bul óńirde 100 myńnan astam qandasymyz turady eken, týý kórsetkishi boıynsha kósh bas­tap tur. Sonymen qatar, tili men dilin, salt-dástúrin qatar ustanyp, ata-baba jolynan aınymaı keledi. Osyndaı jandardyń biri – Omby qalasynyń turǵyny Lázzat Shahýova.  Qannan berilgen qazaqylyq ony ulttyq ónerge qaraı tarta beretin bolsa kerek, qoly qalt etse boldy, naqyshyna kel­tirip, oıý-órnektermen ár­len­gen túrli quraq kórpeler, jas­tyqtar, ulttyq kıimder tigýge qumar. – Bul jaqta týystarym óte kóp. Qazaqtyń toı-dýmany azaı­ǵan ba! Tapsyrystar túsip jatady. Jora-joldastarym surasa, ótinishterin oryndaımyn. Osy­ǵan qaraǵanda, sońǵy kezderi Om­bydaǵy qazaqtar salt-dástúrge bet burǵan sekildi, sonymen qatar, kóbine, is-sharalardyń ulttyq naqyshqa saı ótip jat­qanyn baı­qaımyn. Jeke tap­syrys­tar alý ózimniń jeke hobbıim desem de bolady», – deıdi Lázzat Shahýova. Sońǵy jyldary Reseı men Qazaqstan arasyndaǵy tyǵyz baılanystyń, ol jaqta turyp jatqan qandastarymyzdy ult­­tyq óner men salt-dástúr erek­shelikterinen sýsyndatyp, el­dik kelbetimizdiń tutastyǵyn saq­taýyna da qyzmet etip jat­qany baıqalady. Onyń syrtynda, Omby qazaqtarynyń arasynda Qazaqstanǵa kóship kelip, kásibin dóńgeletip otyrǵan azamattar da bar. О́zderi osy jaqqa kelgenmen, kóbiniń týystary sol aı­maqta áli de turyp jatyr. Týǵan topyraǵyn kim umytsyn, sheka­ranyń arǵy betinde jatyr demesek, Omby aımaǵy – ejelden qazaqtyń atamekeni. Bul azamattar eki eldi de óz Otany sanaıdy. Omby jerindegi qazaqtar tili men mádenı qundylyqtaryn jo­ǵaltyp almas úshin jasalyp jatqan ilgeridegi jumystar eki memleket arasyndaǵy ári­den oılastyrylǵan saıası keli­simderdiń arqasynda júzege asyp otyrǵany belgili. Aıan ÁBDÝÁLI, «Egemen Qazaqstan»