Berekeni eseli eńbekten tile

Ońtústikte agrarlyq salanyń damý deńgeıi joǵary. Búginde osy salada 70 myńnan astam sharýa qojalyqtary bolsa, oblystyń óńirlik jalpy óniminiń on úsh paıyzyn solar qurap otyr. Al egin sharýashylyǵynyń úles salmaǵy 54 paıyzǵa jetedi. Ońtústiktiń sharýalary mal sharýashylyǵyna ábden beıim­delip aldy. Beıimdelgeni qalaı, tórt túlik ata-babamyzdyń kásibi emes pe dersiz, kelisemiz. Biraq, aıtar datymyz bar. Búginde Aýyl sharýashylyǵy mınıstrligine qarasty Sý resýrs­tary komıtetiniń tizginin ustap otyrǵan Islam Ábishev kezinde Ońtústiktegi Ordabasy aýdanyn­da ákim bolǵan. Qazir sharýa qo­ja­lyqtaryna aýdan, qalalarda ashylǵan nesıe seriktestikteri 6-7 paıyzben qarajat berip otyrsa, osy júıeniń ómirge enýine uıytqy bolǵan, jobasyn ázirlegen osy azamat. Islam Ál­mahanuly Badam aýy­lynda jıyn ótkizdi. Qatystyq. Aýyl sharýashylyǵyndaǵy kúr­meýli máseleler sóz boldy. «Sizder aldaryńyzdaǵy bes-al­ty sıyr, ondaǵan jandyq­ta­ryńyzdy óriske aıdap tas­tap qarap otyrasyzdar. Jem jeme­gen sıyrdyń búıiri qaby­syp ne sút, ne et bermeıdi. Anaý Saı­­ramdaǵy Qarabulaq aýy­lyndaǵy mal bordaqylap otyr­ǵan ózbek aǵaıyndarǵa qara­ńyz­dar. Jaıylymdyq jer joq. Biraq, olar baqqan bir qara mal sizderdiń eki sıyryńyzdyń etin beredi. Sıyrlary da sútti. Alyp baraıyn, tájirıbesin úırenińizder», degen. Iаǵnı, maldy óriske aıdap tas­tap, keshke qoralap alýdyń zamany ótip barady. Quramajem jemegen maldyń búıiri maılan­baıdy, sý teginge ketedi. Islam Ábishovtiń sol ańǵartqany sha­rýalarǵa sabaq boldy. Búginde iri qara bordaqylap, aqshany kúrep taýyp otyrǵan qazaq sharýa­la­ry kóp. Sonyń biri – Tóle bı aý­danyndaǵy Saılybaı Sahov aqsaqal. Onyń sharýa qoja­ly­ǵy aýdandaǵy betke ustar sharýa­shylyqqa aınalǵan. «О́mirbaı ata» seriktestiginiń qorasynda búginde asyl tuqymdy júzden astam iri qara baǵymda. Alǵashqyda bıe baılap, saýmal, qymyz daıyndap saýdaǵa shy­ǵarǵan Saılybaı Sahov su­ranysy kóp sútti baǵyttaǵy sha­­­­r­ýashylyqty jolǵa qoıǵan. Seriktestiktegi 60 sıyrdan kú­nine 500 lıtrden astam sút saýy­lady. О́tkizetin jer qaıda deı­tindeı emes, ataqty «Fýd Mas­terdiń» fılıaly irgede. Bul sharýashylyqta aýyldyń on tórt azamaty nápaqasyn aıyryp otyr. – Kásipkerlikti ashýǵa táýekel kerek, – deıdi Saılybaı Sahov. – Jumys joq dep aýyzyńdy qur shóppen súrte berseń esh­kim dúnıesimen bólispeıdi. Qazaqtyń dalasy keń-baıtaq. Jaıylymdyq jer de, jem qory da jetkilikti. Sondyqtan, kásibin ashýǵa júreksinip júr­genderge berer keńesim, óz sha­rýa­shylyǵyńnyń qazyǵyn qaq. Bastapqyda aýyr bolar, biraq, beınet bárin jeńedi. Keıin zeınetin kóresiń. Aýyl sharýashylyǵynda jaq­sy tabysqa jetip otyrǵan se­rik­­tes­tik basshysynyń baılamy osy.  Baqtııar TAIJAN, «Egemen Qazaqstan» Ońtústik Qazaqstan oblysy