Iаdrolyq fızıka ınstıtýtynyń basshysy Oral qalasyna keldi

ORAL. 12 mamyr. Almaty qalasynda Energetıka mınıstrligine qarasty ıadrolyq fızıka ınstıtýty jumys jasaıdy. Bul ınstıtýt 1957 jyly halqymyzdyń birtýar uly, akademık Qanysh Sátbaevtyń bastamasymen qurylǵan bolatyn. Respýblıka aýmaǵynda onyń úsh bólimshesi bar bolsa, sonyń biri Batys Qazaqstan oblysynyń Aqsaı qalasynda ornalasqan. Bul nysan LIRA degen ataýǵa ıe. Buǵan deıin jergilikti turǵyndar bul nysannan radıasııalyq sáýle taratady, dep qaýiptenip kelgen edi. Ekinshiden, olar kezinde asa qaýipti dep sanalatyn, ári atqaratyn qyzmeti kópshilikke túsiniksiz nysannyń qandaı qajettiligi bar degen usynys-pikirlerin de qosa bildirgen bolatyn. Kópshilikti tolǵandyryp kelgen osyndaı saýaldarǵa Oral óńirine sapary kezinde atalǵan ıadrolyq fızıka ınstıtýtynyń bas dırektory Saıabek Sahıev tolyqqandy jaýap berdi. Bul týraly egemen.kz tilshisi habarlady. Onyń aıtýynsha, ınstıtýttyń basty maqsaty – radıasııalyq qaýipsizdikti qamtamasyz etýge jáne reaktorlyq zertteýler júrgizýge baǵyttalǵan. «Sonymen qatar, ınstıtýt janynda keshendi ekologııalyq zertteýler ortalyǵy jumys isteıdi. Bar bolǵany osy ǵana. Munda turǵan eshqandaı qupııa joq. Tipti, «kelemin, kóremin» degen azamattar úshin bizdiń ınstıtýttyń da, «Lıra» nysanynyń da esigi qashanda ashyq», – deıdi ol. Iаdrolyq fızıka ınstıtýty bas dırektorynyń sózinen taǵy bir uqqanymyz, bıyl LIRA-nyń qurylǵanyna 18 jyl tolyp otyr eken. Osy ýaqyt aralyǵynda munda adam ómirine qaýip týǵyzatyndaı teris ekologııalyq kórinister tirkelmepti. Instıtýt basshysy aldaǵy ýaqytta da mundaı jaǵdaı oryn almaıtynyna senim arta alady. Temir Qusaıyn. Derek: egemen.kz. Foto: inform.kz.