ASTANA. 16 mamyr. Ońtústik Koreıa bıligi Nissan Motor avtoónerkásibine jibergen kemshilikteri úshin 300 mıllıon von (280 myń dollar) kóleminde aıyppul salyp, Qashqai úlgisindegi kólikterdiń shyǵarylýyna tyıym salmaq. Bul týraly TASS aqparat agenttigine silteme jasaǵan egemen.kz tilshisi habarlady.
«Biz Nissan kompanııasyna qorshaǵan ortaǵa taraıtyn qaldyqtardy azaıtyp kórsetetin qurylǵy ornatqany úshin osyndaı kólemde aıyppul salýdy josparlap otyrmyz. Al Qashqai kólikteriniń shyǵarylýy toqtatylady. Sonymen qatar, ótken jyldyń qarasha aıynan beri shyqqan avtomashınalar keri qaıtarylady», – dedi Ońtústik Koreıanyń qorshaǵan ortany qorǵaý mınıstrligi.
Atalǵan mınıstrliktiń málimdeýinshe, avtokonsernniń prezıdentine qatysty qylmystyq is qozǵalýy múmkin. Bılik japonııalyq avtokonsernge aqaýly kólikterdi jóndeýden ótkizýge 45 kún ýaqyt berdi.
Aıta keteıik, 2015 jyly dál osyndaı máselege Volkswagen avtokonserni de tap bolǵan. Kompanııa basshylyǵyna Eýropanyń, Azııanyń birqatar elderi iri kólemde aıyppul salyp, kompanııany sotqa berdi. Málimetter boıynsha, álemde 11 mıllıonǵa jýyq kólikte qorshaǵan ortaǵa taraıtyn qaldyqtar kórsetkishin azaıtyp kórsetetin qurylǵy ornatylǵany anyqtaldy. Al osy olqylyqtyń ornyn toltyrý úshin Volkswagen jalpy kólemi 16,2 mıllıard dollarǵa shyǵyndaldy.
Aıan Ábdýálı.
Derek, foto: TASS.