TALDYQORǴAN. 29 mamyr. Almaty oblysynyń ortalyǵynda magazınderge dúrkin-dúrkin qaraqshylyq shabýyl jasap júrgen degen kúdikpen eki er kisi ustaldy. Bul týraly oblystyq ishki ister departamenti baspasóz qyzmetiniń deregine súıengen egemen.kz tilshisi habarlady.
2016 jyldyń qańtarynan sáýir aıyna deıin Taldyqorǵanda birneshe dúkenge qaraqshylyq shabýyldar jasalyp, olardyń egeleri polısııaǵa resmı shaǵymmen keldi. Al tekserý qorytyndysynda jasalǵan qylmystardyń bir qoldan shyqqany belgili boldy.
«Zábir kórýshilerdiń sýretteýleri boıynsha, qaraqshylyq jasaýshylardyń syrtqy keskin-kelbetteri men áreket etý tásilderi bir-birlerine uqsas bolyp shyqty. Qylmyskerlerdiń bireýi esikti tartyp jaýyp tursa, ekinshisi betin betperdemen jaýyp kelip, kassadan aqsha talap etetin bolǵan», - dedi polısııadaǵylar.
Jedel-izdestirý qyzmetkerleri kóp uzamaı osy qylmystardy jasady degen kúdikpen kórshi Eskeldi aýdanynyń 1994, 1995 jyldary týǵan eki aýyl turǵynyn qolǵa túsirdi.
«Qazirgi tańda ustalǵandardyń alty qaraqshylyq shabýylǵa qatystary bar ekenderi dáleldendi. Qalalyq ishki ister basqarmasynyń óndirisindegi faktiler boıynsha tergeý júrgizý jalǵasyp jatyr», - dep atap ótti oblystyq ishki ister departamentindegiler.
Nurbol Áldibaev.
Derek: Almaty oblystyq ishki ister departamentiniń baspasóz qyzmeti.