Jer reformasy boıynsha respýblıkalyq komıssııa janynan tórt jumys toby qurylǵany málim. Iаǵnı qazirgi ýaqytta quqyqtyq, ekonomıkalyq túsindirý jáne qadaǵalaý bloktary jumys isteýde. Men oblystyq qoǵamdyq keńesterdiń de dál osyndaı úlgi men baǵytta jumys isteýi qajettigi jóninde usynys aıtqym keledi. Osy arqyly ashyq oı alańynan aǵylǵan pikirlerdi saraptaý men jınaqtaý ońaıǵa túsedi.
Bir sózben aıtqanda, bul arada «tómennen joǵaryǵa» qaǵıdasy boıynsha aýyldardan bastap aýdandyq, qalalyq jáne oblystyq qoǵamdyq keńesterge usynys-pikirler joldanatyn bolady. Taǵy bir aıtaıyn degenim, jumys toptarynyń naqty maqsat- mindetterin aıqyndap alǵan soń barlyq aqparattar men derekterdi júıelep otyrýǵa múmkindik týady. Budan keıingi kezekte birqatar normatıvtik qujattardy resimdeý isi de asa qıynǵa soqpaıdy degen oıdamyn.
Bul qujattar is barysynda baqylaýǵa alynyp, qajet jaǵdaıda mátinge ózgerister men tolyqtyrýlar engizýge bolady. Kóńilge taǵy bir medeý tutarlyq jaǵdaı respýblıka óńirlerinde qurylǵan qoǵamdyq keńester ázirge taptaýryndylyqtan ada. Onyń músheleri naqty oı-pikirlerin irkilmeı aıta alady. Qoǵamdyq keńesterde osyndaı emin-erkin oıtalqy júrgiziletin bolǵandyqtan, bul uıymdarǵa qoǵamdyq baqylaý quzyretin bergen jón-aý degen oı týady.
Sebebi, keńes quramynda memlekettik organdar men úkimettik emes uıymdardyń ókilderi, zııaly qaýym men qoǵam qaıratkerleri bar. Respýblıkalyq komıssııa izindegi joǵaryda atalǵan jumys toptarynyń qyzmetin jandandyrý arqyly turǵyndarmen kezdesken kezde júıeli túrde ashyq pikir alysýǵa múmkindik týatynyna kúmán keltire almaımyz. Qysqasy, joǵaryda aıtylǵan mańyzdy da mándi máselelerge oraı birqatar túsinispeýshilik kórinisteriniń aldyn alýǵa jol ashylatyny anyq. Osy arqyly halyqtyń qoǵamdyq keńesterge degen senimi de nyǵaıa bermek.
Aıgúl TÝRKINA,
«Zaman» Batys Qazaqstan oblystyq óndirýshiler qaýymdastyǵynyń tóraıymy
ORAL