Qazaqstannyń jańa Konstıtýsııasynyń jobasyna jasandy áreketsizdikten, uzaqqa sozylǵan ınstıtýsıonaldyq daǵdarys ssenarıılerinen qorǵaýdyń pármendi quqyqtyq tetikteri engizilgen. Bul týraly Májilis depýtaty Murat Ábenov Konstıtýsııalyq reforma jónindegi komıssııanyń onynshy otyrysynda sóılegen sózinde málimdedi, dep habarlaıdy Egemen.kz.
Atap aıtqanda, 46-shy jáne 62-baptardyń bastapqy redaksııasy negizgi taǵaıyndaýlardy qaıta kelisýden bas tartqan kezde Quryltaıdyń taratylýyn kózdedi, bul «Kúshti Prezıdent – yqpaldy Parlament – esep beretin Úkimet» formýlasyna sáıkes kelmeıdi.
Konstıtýsııalyq komıssııa jańa Ata zańda volonterlik qyzmet mártebesin bekitýdi qoldady
«Qoǵamda, ásirese, áleýmettik jelilerde jáne sarapshylar ortasynda Quryltaıdy taratýdyń negizderi qyzý talqylandy. Sondyqtan «AMANAT» partııasynyń fraksııasy 46-shy jáne 62-baptyń «Prezıdent taratady» degen tujyrymdamasyn «Prezıdent taratýǵa quqyly» dep ózgertýdi usynady. Osynyń nátıjesinde Quryltaıdy jasandy túrde taratý jáne saıası daǵdarys múmkindigi joıylady. Usynylǵan naqtylaý – bul júıeni ishten shaıqaltýdan, ony jasandy túrde jasalǵan kelispeýshilik arqyly isten shyǵarýdan jáne eldi uzaqqa sozylǵan ınstıtýsıonaldyq daǵdarysqa tartýǵa tyrysýdan saqtandyrýdyń bir túri. Bul ózgerister reformalar logıkasyna jáne Ádiletti Qazaqstan modeline sáıkes keledi. Sondaı-aq Komıssııa múshelerine 62-baptyń ekinshi tarmaǵyna «Prezıdent usynǵan kandıdatýrany taǵaıyndaýdyń» ornyna «Prezıdent usynǵan árbir kandıdatýrany taǵaıyndaý» degen naqtylaý engizýdi usynǵym keledi. Bul osy baptaǵy árkelkilikterdi boldyrmaýǵa múmkindik beredi», dep atap ótti komıssııa múshesi.
Murat Ábenov óz sózinde Vıse-Prezıdent ınstıtýtyn engizý logıkasyna túsinikteme berdi.
«Biz álemdik qoǵamdastyqqa jaqsy tanys Vice-President túsinikti jáne moıyndalǵan halyqaralyq modelin sanaly túrde tańdaımyz. Bul Qazaqstannyń tanymaldyǵy men saıası salmaǵyn arttyrady jáne bizdiń bılik júıemizdi syrtqy seriktester úshin barynsha túsinikti etedi», dep túsindirdi ol Konstıtýsııalyq novellany.
Sonymen qatar Májilis depýtatynyń aıtýynsha, Ata zań jobasynyń novellalaryn durys túsinbeý reformalardyń mánin burmalaýǵa ákep soǵady. Sondyqtan búgin bárin sheship alýymyz qajet.
«Búginde qoǵamda cancel culture, ıaǵnı, «joıý mádenıeti» qubylysy kúsheıip jatyr. Biz ártúrli elderde qoǵamdyq pikirtalastyń shekten shyǵyp ketetinin baıqaımyz: adamdy sózben sendirmeı, «joıý qajet» dep tańbalaıdy. Konstıtýsııa jobasynda buǵan qatysty naqty qundylyq júıesi belgilengen: adamnyń ar-namysy men qadir-qasıetine qol suǵylmaıdy jáne zańmen qorǵalady. Bul synǵa tyıym salý týraly emes. Bizdiń jolymyz – aıqyn pikirtalas jáne jaýapkershilik», dep atap kórsetti ol.
Indıra Áýbákirova: Jańa Konstıtýsııa adam quqyqtary men azamat quqyqtarynyń arajigin aıqyn belgileıdi
Sonymen qatar depýtat qoǵamda da kóptegen máseleler týǵyzǵan Ata zań jobasynyń 5-babynyń 6-tarmaǵyna nazar aýdardy.
«Jelide bul norma «memleket ishindegi memleket» quryp otyr eken degen tezıs belsendi túrde taralyp otyr. Bul shyndyqqa janaspaıdy. Qazaqstan biryńǵaı quqyqtyq keńistigi bar birtutas memleket bolyp qala beredi. Alataý – bul avtonomııa da, erekshe aýmaq ta emes. Bul bizdiń qazaqstandyq qala. Onda jańa jumys oryndaryn qurý, ınvestısııalar tartý úshin bızneske jedeldetilgen rásimder qarastyrylǵan belgili bir qarjylyq derbestik qarastyrylyp jatyr», dep túıindedi Ábenov.
Qazaqstan Halyq partııasy óńirlerde Konstıtýsııalyq reforma barysyn túsindirdi