● Ulttyq qor nesıelik turǵyn úı qurylysyna qosymsha 67 mlrd. teńge bóldi. «Jyl sońyna deıin 60 mıllıard teńgeniń 41,7 mıllıardy ıgeriledi dep kútilýde. Qalǵan qarajat kelesi jyldyń ekinshi-úshinshi toqsandarynda ıgeriledi», – dedi osyǵan oraı «Báıterek» Ulttyq holdıngi basqarmasynyń basshysy Erbolat Dosaev.
● Qashaǵandaǵy munaı óndirý jyl sońyna deıin 35 myń tonnaǵa jetedi. Qazirgi tańda endi gaz aıdaý kólemin arttyrý maqsatynda Qarashyǵanaq ken ornyn odan ári damytý tujyrymdamasy qaralyp jatyr. Osylar jaıynda málimdegen Energetıka mınıstri Qanat Bozymbaevtyń aıtýynsha, Qarashyǵanaqty keńeıtý jobasy keleshekte 6 myńnan astam jańa jumys ornyn ashýǵa múmkindik beredi.
● Jambyl oblysynda Memlekettik rámizder kúnine oraı 170-ke jýyq shara ótti. Oǵan óńirde 50 myń adam qamtyldy. Al qala jastary «Rámizderim – maqtanyshym» atty aksııaǵa belsene qatysty.
● Soltústik Qazaqstanda patrıottar forýmy keń qanat jaıdy. Shara Nazarbaev zııatkerlik mektebiniń oqýshylary daıyndaǵan fleshmobtan bastaldy. Oblys ákimi Erik Sultanov bul kúnniń qazaqstandyqtar úshin erekshe ekenin atap ótti. Sebebi, shynaıy patrıottyq memlekettik rámizderge degen qurmetten bastalady.
● Aqmola oblysynda kóktemgi egis naýqany aıaqtaldy. Bul keshe aımaq basshysy Sergeı Kýlagınniń qatysýymen ótken apparat májilisinde aıtyldy. Naýqanda 4,217 mıllıon gektar aýmaqqa dándi jáne burshaq daqyldary sebilgen.
● Aqtoǵaıda syıymdylyǵy 5 000 tonnalyq qoıma salynyp jatyr. Mundaı derek Pavlodar oblysynyń ákimi Bolat Baqaýovtyń osy aýdanǵa jasaǵan jumys sapary kezinde málim boldy. «Aqtoǵaı Agro» JShS basshysy Igor Golovashov qoımanyń árqaısysy 1 000 tonna kókónis syıdyratyn bes seksııadan turatynyn baıandady.
● Qyzylordalyq kásipker tájirıbesi mol sarapshynyń járdemine júgindi. Syr óńirinde jeke kásipker Aıdos Saılyǵaraevtyń kondıterlik ónimder shyǵaratyn kásiporny álemdik deńgeıdegi tájirıbeli germanııalyq sarapshynyń kómegimen 21 kún boıy ónim túrlerin kóbeıtý jáne sapasyn jaqsartý baǵytynda jumys jasady.
● Ońtústik Qazaqstannyń Sozaq aýdanyndaǵy shıpaly kól sýǵa toldy. Bul gıdrolog-ǵalymdardyń ótken ǵasyrdyń 90-shy jyldarynan beri úzdiksiz tartylyp kelgen Qyzylkóldi qalpyna keltirý baǵytynda jasaǵan jandy jumystarynyń nátıjesinde múmkin boldy. Onyń ústine bıylǵy jaýyn-shashynnyń kóptigi kóldiń 70-80 paıyzǵa deıin kóterilýine yqpal jasady.
Habarlar Úkimet, oblystyq ákimdikter saıttary men «QazAqparat» agenttigi málimetteri boıynsha
daıyndaldy