Burnaǵy jyly UBT kezinde búkil respýblıka boıynsha kúpti kóńilderdi birinshi bolyp qýantqan Almaty qalasyndaǵy memlekettik tilde fızıka-matematıka pánderin tereńdete oqytatyn №178 lıseı bolatyn. Alǵashqy bolyp 125 balldy atalmysh lıseıdiń túlegi Ábdijapar Aıǵanym jınaǵan edi. Sol 2014 jyly bul mekteptiń tórt birdeı túlegi 125 ball jınap, bilim jaǵynan juldyzdary janǵan-dy.
Udaıy jaqsy kórsetkishterge qol jetkizip júrgen Almatydaǵy mańdaıaldy bilim ordalarynyń biri bıyl da tabyssyz emes. Ústimizdegi jylǵy UBT qorytyndysy boıynsha eń joǵary 125 balldy lıseıdiń 11 «á» synyp oqýshysy, «Altyn belgi» ıegeri Túgelbaı Farıza Abaıqyzy jınady.
Qurmet ordeniniń ıegeri, respýblıkamyzǵa tanymal matematık О́tesh Qońyrbaıuly Ábdimajıt basshylyq etetin bul mektepte bıylǵy oqý jyly 131 oqýshy UBT tapsyrdy. Onyń ishinde 34 oqýshy altyn belgi qorǵady, 21-i úzdik attestat ıegeri atanyp, mekteptiń orta baly 110,9 boldy. 5 oqýshysy halyqaralyq ǵylymı konkýrstar men olımpıadalardyń júldegerleri, 8 oqýshy sheteldik oqý oryndary bilim granttarynyń ıegeri. О́z shákirtterin bilim nárimen sýsyndatyp otyrǵan bul lıseı – búgingi kúnniń zamanaýı talaptaryna saı bilim oshaǵynyń biri.
Aınash ESALI,
«Egemen Qazaqstan»
ALMATY