«Nurly Jol» baǵdarlamasy boıynsha qarajatty óńirler arasynda qaıta bólý qajet. Bul týraly keshe Premer-Mınıstr Kárim Másimov Úkimettiń selektorlyq otyrysynda aıtty.
Kezekti Úkimet otyrysynda 2015-2019 jyldarǵa arnalǵan «Nurly Jol» memlekettik ınfraqurylymdyq damytý baǵdarlamasyn júzege asyrý máseleleri qaralǵan bolatyn. Ulttyq ekonomıka mınıstri Qýandyq Bıshimbaevtyń negizgi baıandamasynan keıin Úkimet basshysy «Nurly Jol» baǵdarlamasyna bólingen qarajatty óńirler arasynda qaıta úlestirýge qatysty usynystar engizýdi tapsyrdy.
«Tyń baıandamalarǵa qaramastan, barlyq óńirler osy baǵdarlama boıynsha qajetti resýrstardyń bárin der kezinde ıgere alady degenge kúmánim bar. Sondyqtan, Ulttyq ekonomıka mınıstrligine osy aptada usynystar engizýdi tapsyramyn», dedi K.Másimov. Tipti, kelesi seısenbide ony qaıta talqylap, ıgere almaǵandardyń máselesi qaralatynyn atap kórsetti. «Eger oryndaı almaıtyndar bolsa, ony jaqsy oryndaıtyndarǵa beremiz», dedi Úkimet basshysy Ulttyq ekonomıka mınıstrine qarata sóılegen sózinde. Q.Bıshimbaev baǵdarlamaǵa baılanysty qarjyny birqatar oblystar óz deńgeıinde ıgere almaı otyrǵanyn aıtqan bolatyn.
О́tken jyly «Nurly Jol» memlekettik baǵdarlamasyn iske asyrý úshin Ulttyq qordan 770,1 mlrd. teńge bólingen. Onyń 92 paıyzy ıgerildi. Al bıyl Ulttyq qordan 839,9 mlrd. teńge bólinedi. Onyń ishinde respýblıkalyq bıýdjetten nysanaly transfertter túrinde 503,4 mlrd. teńge jáne ulttyq holdıngterdiń oblıgasııalyq qaryzdary arqyly 336,5 mlrd. teńge qarastyrylǵan.
Mınıstrdiń aıtýynsha, 2016 jylǵy 1 maýsymdaǵy jaǵdaı boıynsha atalǵan qarjynyń 99,1 mlrd. teńgesi nemese 12 paıyzy ıgerilgen. Onyń ishinde kóliktik-logıstıkalyq ınfraqurylymdy damytý baǵyty boıynsha 47,2 mlrd. teńge, respýblıkalyq mańyzy bar kólik joldaryn salý jáne qaıta jańǵyrtý úshin 35,2 mlrd. teńge jumsalǵan.
«2016 jyly shamamen 900 shaqyrym respýblıkalyq mańyzy bar kólik joldaryn salý jáne jańǵyrtý josparlanǵan. Onyń ishinde Almaty – Shý ýchaskesinde ekinshi temirjol qurylysyna 8 mlrd. teńge, Quryq portynda paromdyq ótkel salýǵa 4 mlrd. teńge jumsalady», dedi Q.Bıshimbaev. Sonymen qatar, mınıstrdiń aıtýynsha, jylýmen, sýmen jabdyqtaý jáne sý tartý júıesin jańǵyrtýǵa bıýdjettik kredıtteý arqyly 16,6 mlrd. teńge bólý josparlanǵan.
«Jalpy, 2016-2017 jyldary ınjenerlik jelilerdiń 1 184 shaqyrymy, onyń ishinde jylýmen jabdyqtaýdyń 92 shaqyrym, sýmen jabdyqtaý júıesiniń 816 shaqyrym jáne sý tartý júıesiniń 276 shaqyrymyn salý jáne jańǵyrtý josparda bar», – dedi Ulttyq ekonomıka mınıstri.
Al óz kezeginde Investısııalar jáne damý mınıstri Áset Isekeshev kólik salasynyń jobalaryn júzege asyrýǵa, tehnıkalyq standarttardy saqtaý úshin zerthanalyq bazany qurýǵa, geologııalyq barlaýǵa qatysty jumystar jaıyna toqtaldy. Á.Isekeshevtiń málimdeýinshe, «Nurly Jol» memlekettik baǵdarlamasy sheńberinde 11 avtojol salynady. Salynǵan avtojoldar oblystardyń bip-bipimen saýda-sattyǵyn, ekonomıkalyq baılanystaryn nyǵaıtyp qana qoımaı, elimizdiń áleýmettik-ekonomıkalyq ósýine, shaǵyn jáne orta bıznestiń damýyna oń yqpal etedi. Al, tasymaldardyń kólemi 2,5 ese ósedi dep josparlanýda. Buǵan qosa, qalalar arasyndaǵy kólik qoljetimdiligin jaqsartý esebinen jalpy óńirlik ónimniń ortasha jyldyq ósýi 80 mlrd.teńgeni quraıdy. Salynǵan joldardyń boıynda ulttyq standartqa sáıkes 200-den astam qyzmet kórsetý obektileri salynyp, qyzmet kórsetý salasynyń damýyna jáne jol ınfraqurylymyn jaqsartýǵa yqpalyn tıgizedi. Jalpy, jol qurylysynda 30 kompanııa jumys atqarýda. Bıyl elimizdegi barlyq joldardyń qurylysyna, sonyń ishinde «Nurly Jol» aıasynda salynyp jatqan jobalardyń qurylysyna 100 myń adam jumysqa tartylady.
Úkimet otyrysy barysynda «Nurly Jol» memlekettik baǵdarlamasynyń iske asyrylýy jaıynda Qarjy mınıstri Baqyt Sultanov, Bilim jáne ǵylym mınıstri Erlan Saǵadıev, «Báıterek» Ulttyq holdıngi basqarmasynyń basshysy Erbolat Dosaev jáne taǵy basqalar baıandama jasady. Qorytyndysynda Úkimet basshysy el damýy úshin asa mańyzdy baǵdarlamanyń óz deńgeıinde oryndalýyn qatań baqylaıtynyn aıtyp, tıisti organdarǵa birqatar tapsyrma berdi.
Dınara BITIKOVA,
«Egemen Qazaqstan»