Memleket basshysy Nursultan Nazarbaevtyń atyna Reseı Federasııasynyń Prezıdenti Vladımır Pýtınnen kóńil aıtý jedelhaty kelip tústi, dep habarlady Qazaqstan Prezıdentiniń baspasóz qyzmeti.
Vladımır Pýtın Nursultan Nazarbaevqa Aqtóbe qalasynda terrorısterdiń zulymdyq áreketi saldarynan qazaqstandyq áskerı qyzmetshiler men elimizdiń beıbit turǵyndarynyń qaza bolýyna baılanysty kóńil aıtty.
«Bolǵan oqıǵa terrorızmniń shekara talǵamaıtynyn jáne álemniń barlyq eli men búkil halqy úshin aıqyn qater tóndiretinin taǵy da kórsetip berdi. Bul zulymdyqty tek barsha jahan jurtshylyǵy bolyp kúsh-jiger jumyldyrý arqyly jeńýge bolady. Reseı Qazaqstanmen antıterrorlyq baǵyttaǵy seriktestik ózara is-qımyldy budan ári de nyǵaıtýǵa ázir ekenin bildirgim keledi», – delingen jedelhatta.
Sondaı-aq, Reseı Prezıdenti qaza bolǵandardyń týǵan-týystary men jaqyndaryna shyn nıetpen kóńil aıtatynyn jáne sodyrlardyń qolynan zardap shekkenderdiń barlyǵynyń tezirek saýyǵyp ketýine tilektes ekenin jetkizýdi ótindi.