Táýligine 10 tonna sútti qaıta óńdeý qýatyndaǵy «Astana-О́nim» aksıonerlik qoǵamy elordanyń azyq-túlik beldeýin qamtamasyz etýdegi mańyzdy býyn sanalady.
Kásiporynnyń bas dırektory Ǵalymjan Ábdihalyqovtyń aıtýynsha, sharýashylyqta 680 bas saýyn sıyr jáne jylqy men túıe túlegi bar. Keshenniń jobalyq qýaty 800 iri qaraǵa arnalǵandyǵyn eskersek, «Astana-О́nimniń» aldaǵy damý qarqynyn baǵamdaı berýge bolady. Qazir munda asyl tuqymdy ár sıyrdan jylyna 6000 lıtrge deıin sút saýylýda. Bul keshenniń astanalyq naryqqa sút, aıran, qaımaq, qurt, irimshik, qymyz, shubat sııaqty ónimderdiń 23 túrin shyǵarýyna múmkindik berýde. – Qazirgi tańda biz analyq mal basyn kóbeıtýge múddelimiz, – deıdi bas dırektor. – О́z menshigimizdegi bordaqylaý alańyn jabdyqtaý máselesi de kún tártibinen túspeı tur. Biraq, malazyǵyna arnalǵan ekpe jerdiń, jaıylymdyq alqaptyń jetispeýshiligi qolymyzdy baılaýda.
Baqbergen AMALBEK,
«Egemen Qazaqstan»
Aqmola oblysy, Selınograd aýdany