О́tken jyly gazetimizde Kaztalov aýdanyndaǵy Qaıyńdy aýylynyń turǵyny Asylulan Jaıynov Qaraózen aıdynynan salmaǵy 45 kılo, uzyndyǵy 2 metr bolatyn nán jaıyn ustap alǵany jóninde keńeıtilgen aqparat jarııalaǵan bolatynbyz. Árıne, ol brakoner emes. Jumystan qoly bosaǵan kezde aýyl irgesindegi ózenge kelip qarmaq salý onyń tek qur ermegi ǵana. Balyq túrleriniń arasynda eń qomaǵaıynyń biri – osy jaıyn dese de bolady. Máselen qustyń ishinde úırek aýzyna ne túskenin talǵamaı juta beretin bolsa, jaıyn da solaı ózine ilingen sýdaǵy tirshilik etetin jándiktiń qaı-qaısysyn da tańdamastan qylǵyta beretinge uqsaıdy.
Bul rette Asylulan jaıyn ustaý úshin qarmaǵyna qurbaqa ilýdi ádetke aınaldyrypty. О́tken jyly ustaǵan jaıyny soǵan ilikse, bul joly da dál solaı bolypty. Úlken qurbaqany qapqan ańǵal jaıyn qarmaqqa qalaı ilingenin ańǵarmaı qalypty. Áıteýir, osy joly A.Jaıynov qasyndaǵy serigimen ekeýlep júrip balyqtyń «shoshqasyn» jaǵaǵa súırep alyp shyǵypty. Onyń bıyl ustaǵan sońǵy jaıynynyń salmaǵy 70 kılo tartypty. Al uzyndyǵy 2 metr, 20 santımetrden asqan eken. Bul byltyrǵy ustalǵan jaıynnyń salmaǵynan 25 kıloǵa artyq, 20 santımetrge uzyn. Búginde Jaıynovtyń jaıyn ustaýdaǵy «is-tájirıbesi» qarmaq salǵandy ermek etetin óńirdegi ózge áýesqoılardyń da nazaryn aýdaryp, olardyń qatty qyzyǵýshylyǵyn týǵyzyp otyr.
Osy arada taǵy bir aıtaıyn degenimiz, Qaraózen – áıgili Edil ózeniniń bir saǵasy. Ol óz arnasyn Reseı aýmaǵyndaǵy Edilden tartady. Munyń ózi munda iri balyqtardyń ósip-ónýine yńǵaıly jaǵdaı jasalǵanynyń bir kórinisi deýge bolady. Ári ózen sýynyń tereń ekendiginiń aıǵaǵy. Osy jaǵymdy jáıt reseılikter Edil ózenin qorǵaýǵa, ondaǵy balyq qorynyń kóbeıýine memlekettik deńgeıde kóńil bólip otyrǵanyn tanytady. Al Oral óńiri aýmaǵyndaǵy Jaıyq ózeni men Shalqar kóliniń deńgeıi jyldan jylǵa tartylyp mundaǵy balyq túrleriniń múldem azaıyp jáne usaqtalyp bara jatqany bárimizdi oılandyrýǵa tıisti.
Temir QUSAIYN,
«Egemen Qazaqstan»
Batys Qazaqstan oblysy,
Kaztalov aýdany,
Qaıyńdy aýyly