Qazaqstan BUU Qaýipsizdik Keńesine saılandy

Qazaqstan Respýblıkasy Azııa toby memleketteriniń atynan Birikken Ulttar Uıymy Qaýipsizdik Keńesiniń 2017-2018 jyldarǵa ýaqytsha múshesi bolyp saılandy. Bul týraly 2016 jylǵy 28 maýsymda Nıý-Iorkte BUU Bas Assambleıasynda ótken daýys berýdiń nátıjesinde málim boldy. Daýys berýge qatysqandardyń ara­synan 138 memleket Qazaq­stan­nyń kandıdatýrasy qoldady. Qazaq­standyq ótinimniń jalǵyz báse­kelesi – Taıland Koroldigi úshin 50-den astam memleket daýys ber­di. «Búkil Qazaqstan úshin bul tarıhı kún, óıtkeni, bizdiń elimiz BUU Jarǵysy boıynsha jahandyq qaýipsizdik pen beıbitshilikti saqtaýǵa ókilettengen eń mańyzdy saıası organnyń quramyna tarıhta birinshi bolyp saılanǵan Ortalyq Azııanyń memleketi boldy. Búgingi nátıje –  Qazaqstannyń jáne Elbasymyz Nursultan Nazar­baev­tyń jeke tulǵasynyń halyq­aralyq deńgeıdegi bıik bede­liniń, onyń jahandyq jáne óńir­lik máselelerdi retteýge, ıadro­lyq qarýsyzdaný men taratpaý máselelerin ilgeriletýge qosqan biregeı úlesiniń jarqyn aıǵaǵy», – dep málimdedi osyǵan oraı Qa­zaqstan Respýblıkasynyń Syrtqy ister mınıstri Erlan Ydyrysov. BUU QK-ge saılaný, sondaı-aq, bizdiń memleketimizdiń beı­bit­súıgish dáıekti syrtqy jáne ishki saıasatynyń halyqaralyq qoǵam­das­tyqta joǵary qurmetteletinin dáleldedi. Al endi anyqtama retinde aıta ketetin bolsaq,  BUU Qaýipsizdik Keńesi 15 memleketten quralǵan, olar­dyń beseýiniń turaqty múshe­lik mártebesi bar (Reseı, AQSh, Qytaı, Ulybrıtanııa jáne Fran­sııa), al qalǵan onynyń árqaısysy eki jyldyq merzimge 5 óńirlik toptar­dyń atynan saılanady. Qazaq­stan 2017 jyldyń basynan Azııa memleketteri tobynyń ókili re­tinde Malaızııany almastyratyn bolady. «Egemen-aqparat»