Jezqazǵan qalasynda baıdarka men kanoeda eskek esýshilerdi daıarlaıtyn jańa sport mektebi paıdalanýǵa berildi. Zamanaýı talaptarǵa saı salynǵan qos qabatty ǵımaratta sportshylardyń jan-jaqty daıyndalýyna barlyq jaǵdaı qarastyrylǵan. Munda teorııalyq sabaqtarǵa arnalǵan oqý synyptary, jattyǵý zaldary, jýyný jáne kıim aýystyrý bólmeleri jabdyqtalǵan, dep habarlaıdy Egemen.kz.
Osy ýaqytqa deıin óńir sportshylary atalǵan sport túrimen tek jaz mezgilinde ǵana shuǵyldansa, endi jańa nysannyń ashylýymen jyl boıy jattyǵý jasaýǵa múmkindik týdy. Sonymen qatar qys mezgilinde eskek esýshilerdiń shańǵy sporty arqyly jalpy dene daıyndyǵyn jetildirýine de qolaıly jaǵdaı jasalyp otyr. Bul – sportshylardyń kásibı sheberligin arttyryp, respýblıkalyq jáne halyqaralyq jarystarda joǵary nátıjege qol jetkizýine negiz bolmaq.
Ulytaý oblysynda ınvestısııalyq jobalar talqylandy
Ashylý saltanatynda Ulytaý oblysynyń ákimi Dastan Ryspekov eskek esý sportynyń óńir úshin tarıhı mańyzy zor ekenin atap ótti.
«Eskek esý sporty da aımaǵymyzda ózindik orny bar, talaı daryndy sportshylardy túletken sala. Búgingi jańa mektep – sol ıgi dástúrdiń jalǵasy. Biz jas sportshylardyń kásibı turǵyda ósýine, halyqaralyq arenalarda el namysyn qorǵaýyna barlyq qajetti jaǵdaıdy jasaı beremiz», dedi óńir basshysy.
Ulytaý oblysynda búgingi tańda 9 jańa sport kesheni paıdalanýǵa berilip, sporttyq ınfraqurylym 25 paıyzǵa jańartyldy. Bul – buqaralyq sportty damytýǵa jáne salaýatty ómir saltyn qalyptastyrýǵa baǵyttalǵan júıeli jumystyń nátıjesi.
Ulytaý oblysynda óńirlik koalısııa quryldy
Aıta keteıik, jańa nysan boı kótergen Jezqazǵan qalasynyń Batys aýdanynda sol kúni Ulttyq bank ǵımaraty da ashyldy. Bul – oblys ortalyǵyndaǵy jańa aýdannyń júıeli ári qarqyndy damyp kele jatqanyn aıqyn kórsetedi.
Jalpy, qalanyń jańa bóligi aldaǵy ýaqytta óńir damýynyń zamanaýı kelbetin aıqyndaıtyn mańyzdy ortalyqqa aınalmaq. Bıyl maýsym aıynda munda oqýshylar saraıyn ashý josparlanyp otyr, sondaı-aq jańa emhananyń qurylysy bastalady. Bul bastamalar turǵyndardyń ómir sapasyn arttyryp, áleýmettik ınfraqurylymdy jańa deńgeıge kóterýge baǵyttalǵan.
Ulytaý oblysynda ústel tennısinen respýblıkalyq chempıonat bastaldy