Shanhaı yntymaqtastyq uıymynyń hatshylyǵynda Qazaqstan Respýblıkasynyń osy uıymǵa tóraǵalyq etýine baılanysty tusaýkeser boldy. Oǵan Qazaqstan men Qytaıdyń mınıstrlikteri men vedomstvolarynyń ókilderi, Shanhaı yntymaqtastyq uıymyna múshe memleketterdiń Beıjińdegi elshileri men dıplomanttary, QHR Ǵylymı-zertteý ortalyqtarynyń basshylary qatysty.
Kópshilikke málim, Qazaqtan Respýblıkasy 2016-2017 jyldary Shanhaı yntymaqtastyq uıymyna tóraǵalyq etedi. Osy uıymnyń Bas hatshysy R.Alımovtyń aıtýyna qaraǵanda, Prezıdent Nursultan Nazarbaevtyń basshylyǵymen Qazaqstan Táýelsizdik alǵan jyldar ishinde syrtqy saıasatta strategııalyq mańyzdy qadamdar jasaı bildi.
– Tashkent sammıtinen keıin Shanhaı yntymaqtastyq uıymyna tóraǵalyq etý Qazaqstan Respýblıkasynyń ıeligine ótti. Shynyn aıtqanda, Qazaqstan osy uıym alǵashqy qurylǵan kúnnen bastap onyń damýyna aıtarlyqtaı úles qosyp keledi, – dedi R.Alımov. – Atalǵan uıymǵa tóraǵalyq etý Qazaqstannyń Birikken Ulttar Uıymy Qaýipsizdik Keńesiniń 2017-2018 jyldardaǵy turaqty emes músheligine saılanýymen tuspa-tus keldi. Munyń ózi Qazaqstannyń aımaqtyq jáne álemdik deńgeıde belsendiligi men abyroı-bedeliniń joǵary ekendigin taǵy bir márte aıǵaqtap berdi.
Tusaýkeser barysynda Shanhaı yntymaqtastyq uıymynyń aldaǵy basym baǵyttary negizgi áńgime ózegi boldy. Bul jaıynda Qazaqstan Respýblıkasynyń Qytaıdaǵy Tótenshe jáne ókiletti elshisi Sh.Nuryshev oı-pikirin ortaǵa saldy.
– Qazaqstan Prezıdenti Nursultan Nazarbaev jaqynda ǵana Tashkentte ótken sammıtte osy uıymǵa múshe elder aımaqtyq qaýipsizdikti nyǵaıtý men ekonomıkalyq yntymaqtastyqty damytýdy, kólik-tranzıttik áleýetti kóterý men mádenı-gýmanıtarlyq baılanystardy tereńdetýdi basym baǵyttar retinde ustanýdy kótergen edi. Sonymen birge, uıymǵa múshe memleketterdiń halyqaralyq terrorızmge qarsy birlese kúres júrgizýi óte mańyzdy bolyp otyr. Elbasy aıtqan osyndaı ózekti máseleler Shanhaı yntymaqtastyq uıymynyń basty basymdyqtary bolady, – dedi Qazaqstan elshisi.
Qazaqstan Prezıdenti N.Nazarbaevtyń usynysy boıynsha Shanhaı yntymaqtastyq uıymynyń Astana sammıti «EKSPO-2017» halyqaralyq kórmesiniń ashylýy qarsańynda 2017 jyly 8-9 maýsym kúnderi ótkizilmek. Qazir osy sharaǵa ázirlik jumystary bastalyp ketti.
Sadyq ÁKIJANOV,
«Egemen Qazaqstan» – Beıjińnen
Qytaı Halyq Respýblıkasy