Astanaǵa arnalǵan on kún

Keshe Elbasy kitaphana­synda «Ashyq esik kún­deri» merekelik onkúndigi saltanatty túrde ashyl­dy. Shara elordamyzdyń tý­ǵan kúnine oraı uıymdas­ty­rylǵanyn esterińizge salamyz.  «Biz bıylǵy jyly elimiz­diń tarıhyndaǵy taǵy bir erekshe beleske jettik. El Táýel­sizdiginiń 25 jyldyǵy. Bul data ótken ómirimizdiń paraǵynda altyn árippen tańbalanary sózsiz. Qazaqstannyń áleýmet­tik-eko­­nomıkalyq qaryshtap da­mýy­nyń, álem tanyǵan már­te­beli mem­leket bolyp qalyp­tasýy­nyń aıqyn aınasy – Astana desek, artyq aıtqandyq bolmas. Elordamyzdyń 18-shi týǵan kúni Táýelsizdiktiń 25 jyldyǵy­men tuspa-tus kelip otyrǵa­nyn aıryqsha atap ótken abzal. Osy oraıda uıymdastyry­lyp otyrǵan búgingi kórme­niń ma­ńyzy joǵary. Sebebi, ol keshegi kúni men búgingi kún­niń ara­syndaǵy altyn kópir is­petti», – dedi Memlekettik hat­shy Gúlshara Ábdiqalyqova. Merekelik shara barysynda meımandar Astana kúnine arnal­ǵan kórmelermen tanysty. Olar­dyń ishinde – «Elbasy álemi: Tulǵa. Saıasatker. Jasampaz» ta­qyrybyndaǵy muraǵat qujattary fotoderekteriniń kórmesi bar. Onda Elbasy N.Á.Nazarbaevtyń jasampaz isterin pash etetin jáne jańa elordamyzdyń tarı­hynan syr shertetin muraǵat qujattary usynylǵan. Kórme jas býyn­nyń rýhanı-adamgershilik qundylyqtaryn damytýǵa, óskeleń urpaqtyń boıynda aza­mattyq jaýapkershilikti jáne otansúıgishtikti qalyptastyrýǵa baǵyttalǵan. Kórme avtorlary Qazaqstan Respýblıkasynyń Tuńǵysh Prezıdenti – Elbasyn tulǵa, álemdik deńgeıdegi saıasatker, eldiń qoǵamdyq-saıası hám áleý­mettik-ekonomıka­lyq ómi­rin­degi kóregendik jáne jasampaz ózgeristerdiń basta­mashysy, je­tek­shisi ári qatysý­shy retinde sıpattaıtyn túpnusqalyq tarıhı qujattaryn usynǵan. «Estelikke qoltańba» kórmesi shetel memleketteri bas­shy­lary­nyń, tanymal tulǵalardyń Elbasynyń atyna syıǵa berilgen biregeı sýrettermen erekshelendi. Eks­pozısııaǵa 40 erekshe foto­qujattar usynyldy. Olar­dyń qatarynda AQSh prezıdenti B.Klıntonnyń, Fı­lıppın prezıdenti G.M.Ar­roıonyń, AQSh vıse-prezıdenti A.Gordyń, hanzada Charlzdyń qoltańbalary bar sýretter qoıylǵan. Al «Astananyń bolashaǵy – balalardyń kózimen» taqyry­byn­daǵy kórmede eli­mizdiń jáne elordamyzdyń, ulttyq máde­nıettiń damý tarı­hyna arnal­ǵan balǵyndardyń sýretteri kór­setilgen. Astanalyq balalar óz­deri­niń oılary men armandaryn beıneleý óneri arqyly jet­kizýge tyrysqan. Sonymen birge, «Eýrazııa júreginde» foto­kór­­mesinde Qazaqstan Jýrna­lıs­­ter odaǵynyń múshesi Alek­sandr Parhomenkonyń tóltýyn­dy­lary pash etildi. Onda Astana qala­sy­nyń kórinisterine arnalǵan 60 fo­to­sýret kózdiń jaýyn alady. Ta­ny­mal fotosýretshi ónersúıer qaýym úshin dáris oqyp, 15 jyl bu­ryn Memleket basshysynyń Pav­lo­dar oblysyna jasaǵan issa­pa­rynyń sýretteri bar dıskini Elba­sy­nyń kitaphanasyna syıǵa tartty. Osylardyń arasynda Álem chempıony, halyqaralyq gross­meıster Dármen Sádýa­qasov­tyń shahmat boıynsha sheberlik synybyn ótkizgeni, eki márte álem chempıony, «Qazaqstan Res­p­ýb­lıkasy toǵyzqumalaq sporty federasııasynyń» atqa­rýshy dırektory Serik Aqtaev toǵyzqumalaq boıynsha jarys jáne sheberlik synybyn uıym­das­tyrǵany kórermen úshin qyzyqty boldy. Onyń barlyǵy elordamyzdyń týǵan kúnine arnalǵanyn aıta ketsek deımiz. Joǵaryda atap ótken mere­kelik sharalar shildeniń 1-inen 10-na deıin jalǵasady. Raýan QAIDAR, «Egemen Qazaqstan»