Erteń Astanada qazaq kúresinen kezekti ret Elbasy Nursultan Nazarbaevtyń júldesine arnalǵan «Qazaqstan barysy» respýblıkalyq týrnıriniń fınaldyq beldesýleri bolady.
Oǵan qalalyq, aýdandyq jáne oblystyq týrnırlerde kúsh synasyp, irikteý jarystarynan súrinbeı ótken balýandar qatysady. Osylaısha, 3 kezeń boıynsha bıylǵy «Qazaqstan barysy» týrnırine 32 balýan jáne «Ásker barysy» týrnıriniń jeńimpazy – Talǵat Ámirenov pen 2015 jylǵy «Qazaqstan barysy» Beıbit Ystybaev joldama aldy.
Bıylǵy týrnırdiń bir ereksheligi, balýandar kilemge jańa kúrteshemen shyǵady. О́zgertilgen kúrteshe aldyńǵy qoldanystaǵyǵa qaraǵanda, tyǵyz ári sapaly matadan tigilgen. Endi sportshylar kúresip jatqanda belbeýin sheshse, eskertý jasalady. Kilemdi qolymen tirep tursa, qarsylasyna búk upaıy beriledi. Sonymen birge, kúrtesheniń jeń ishinen ustaýǵa ruqsat berildi. Qazaq kúresi federasııasynyń vıse-prezıdenti Sadyq Mustafaevtyń aıtýynsha, balýandar kúreskende, ádeıi belbeýin sheshýi múmkin. Ol ýaqytty sozdyryp, demalý úshin solaı isteıdi. «Bıylǵy týrnırde sportshylar jańa ereje boıynsha kúresedi. Bul balýandardyń kúresýine yńǵaıly bolýy úshin jasaldy», dedi ol.
Týrnırge qatysty taǵy bir jańalyq, beldesýlerge analızdik synamalarynan tyıym salynǵan meldonıı sýbstansııasynyń tabylýyna baılanysty qazaq kúresinen uıymdastyrylatyn barlyq jarystardan ýaqytsha shettetilgen balýandar qatysady. Jaqynda Búkilálemdik dopıngke qarsy agenttiginiń (VADA) usynysy negizinde dopıngke qarsy ulttyq ortalyǵy tártiptik komıssııasynyń sheshimine sáıkes, Mereke Turashev (Aqmola oblysy), Aleksandr Kasachev (Almaty oblysy), Samır Mamedov (Pavlodar oblysy) jáne Aıbek Nuǵymarov (Shyǵys Qazaqstan oblysy) analızderindegi meldonııdiń konsentrasııasy 1 mkg/ml-den az bolǵandyqtan, olarǵa týrnırge qatysýǵa ruqsat berildi.
Qazaq kúresi federasııasynyń prezıdenti, «Qazaqstan barysy» qazaq kúresin damytý qory qamqorshylar keńesiniń tóraǵasy Arman Shoraevtyń aıtýynsha, bıyl jarys byltyrǵyǵa qaraǵanda tartysty da qyzyqty ótedi. «Avtokólikterdi AllurAuto kompanııasy qamtamasyz etti. AllurGroup dırektorlar keńesiniń múshesi Dın Kım elimizde jasalatyn JAC S3 markaly eki avtokólik syılaıdy. Týrnırdiń jalpy aqshalaı júlde qory – 41 400 000 teńge. Birinshi orynǵa – 25 000 000 teńge, ekinshi orynǵa – 5 500 000 teńge, úshinshi orynǵa 1 800 000 teńge beriledi. Sonymen qosa, bıyl týrnır tarıhynda tuńǵysh ret týrnır jeńimpazy aqshalaı syılyqtan basqa, elordadan páter alady», dedi ol.
Dastan KENJALIN,
«Egemen Qazaqstan»