Almatyda Qazaqstannyń Eńbek Eri, halyq jazýshysy Oljas Súleımenov bir top jýrnalısterge ótken kásibı merekesi qurmetine oraı aqshalaı syılyqtar men arnaıy dıplomdar tabys etti.
Qalamgerlerge arnalǵan bul syılyq – qazaqstandyq belgili jýrnalıst-jazýshy Gennadıı Tolmachevtiń atymen atalady ári ol 2007 jyly «Lenınskaıa smena» (qazir – «Ekspress K») gazetiniń quryltaıshylyǵymen taǵaıyndalǵan. «Ǵylym ordasynyń» májilis zalynda marapatqa ıe bolǵandar men saltanatqa qatysýshylarǵa arnap sóz sóılegen aıtýly aqyn, dıplomat Oljas Omaruly Súleımenov eń aldymen pýblısıst-jazýshy Gennadıı Tolmachev týraly jyly lebiz bildirdi. Onyń óz zamanynda Almaty oblystyq «Ognı Alataý» gazetin Almatydaǵy eń oqyrmany kóp basylym jasaǵan redaktorlyq tamasha qabiletin súısine eske túsirdi. Aıtpaqshy, Oljas Súleımenovtyń burynǵy KSRO-ny dúr silkindirgen «Az ı ıa» kitabynyń redaktory da sol Gennadıı Tolmachev ekendiginen búgingi urpaq habarsyz bolýy da múmkin.
Jýrnalısterge tapsyrylǵan syılyqtyń «Qazaqstan redaktorlar jasaǵynyń ańyzdary» («Legendy redaktorskogo korpýsa Kazahstana») nomınasııasy boıynsha aqshalaı syılyq pen arnaıy dıplomdy burynǵy «Sosıalıstik Qazaqstan» (qazir «Egemen Qazaqstan») gazeti redaktorynyń birinshi orynbasary, «Halyq keńesi» gazeti men «Aqıqat» jýrnalynyń bas redaktory qyzmetterin atqarǵan Sarbas Aqtaev, «Lenınskaıa smena», «Kazahstanskaıa pravda» gazetteriniń burynǵy redaktory Fedor Ignatev ıelendi.
Qazylar alqasynyń tańdaýymen budan tys eki jýrnalıske oqyrmandar arasynda eleýli de jaǵymdy pikir týǵyzǵan – otandyq BAQ-taǵy eń úzdik jarııalanymdary úshin qurmetti ataǵy berildi. Olar – «Almaty aqshamy» qalalyq gazetiniń bólim meńgerýshisi Ermekbaı Záńgirov pen Shyǵys Qazaqstan oblystyq QHA-nyń «Assambleıa jarshysy» gazetiniń redaktory Andreı Kratenko.
Syılyq ıeleriniń árqaısysyna teńgeniń búgingi baǵamyna saı 2500 AQSh dollary men arnaıy dıplom tapsyryldy.
Talǵat SÚIINBAI,
«Egemen Qazaqstan»
ALMATY